Kryeministri Edi Rama ka reaguar sërish në rrjete sociale, teksa protesta para Kryeministrisë është në ditën e 21-të.

Në një foto të postuar në Facebook Rama thekson se në atë protestë ka nga ata që kanë shkelur ligjin me të dyja këmbët.

Kreu i qeverisë ka publikuar një foto të një protestuese ku sipas tij është ajo është njëkohësisht ndërtuese e një shtese pa leje brenda mureve të Kalasë së Durrësit dhe një prej zërave që bën thirrje për protesta nga diaspora.

Kryeminstri nënvizon se rasti tregon “algoritmin e manipulimit në rrjetet sociale”, teksa thekson se qyterja është edhe militante e Partisë Demokratike.

"DY FOTOGRAFI DHE DY FYTYRAT E NJË SIMBOLI TË THIRRJES PËR DIASPORËN NË PROTESTË

Majtas: Një shtesë skandaloze pa leje brenda mureve të kalasë së Durrësit. Shteti do ta shpronësojë në kuadrin e pastrimeve për Rilindjen e Zonës Historike, sipas projektit të miratuar.

Djathtas: Një protestuese e përbetuar për mbrojtjen e mjedisit që bërtet, “Diaspora këtë vit nuk do të vijë për pushime, por për protestë”. Ajo është vetë ndërtuesja e shtesës pa leje, e cila ka deklaruar përpara meje se do hidhet me kokë nga tarraca, po nuk e pranon fondin e shpronësimit të atij çibani ngaqë i duket pak!

Pikërisht kështu funksionon algoritmi i manipulimit në rrjetet sociale:

Një shkelëse e ligjit, qëndrestare kundër pastrimit të trashëgimisë kulturore nga çibanët e ndërtuar pa leje vishet me flamurin e interesit publik, ve kujën për atdheun në rrezik dhe kthehet në heroinë.

Fakti pastaj që ky personazh grotesk është edhe militante e vajmedet Partisë Demokratike, e fut rastin në një kornizë shembullore të dashurisë për natyrën

*Çibani ka një hipotekë nga koha e dy gishtave", shkruan Rama në rrjetet sociale.