Protestat e Vetëvendosje, Thaçi:
Nuk dorëzoj shtetin para askujt

LIPJAN – Kryeministri i Kosovës, Hashim Thaçi, ka deklaruar se respekton të drejtën e qytetarëve për të protestuar por nuk ka ndërmend që ta dorëzojë shtetin para askujt. Në një takim me strukturat e partisë së tij, PDK, në qytetin e Lipjanit, Kryeministri Thaçi komentoi protestat e fundit të organizuara nga Vetëvendosje: “Nuk e dorëzoj shtetin para askujt dhe është mirë që ata që dolën para Qeverisë të hënën e kanë kuptuar mesazhin e vijës së kuqe. Ata po duan dhunshëm t’i marrin kufijtë dhe institucionet, por aty ka vijë të kuqe”, tha ai.
Thaçi është ndalur edhe mbi debatin e ngritur nga opozita pas marrëveshjes së arritur pak ditë më parë me Beogradin mbi përfaqësimin rajonal të Kosovës. “Nuk do ta mbajë Kosovën të izoluar për teka të atyre njerëzve që shikojnë në të kalurën dhe jo në të ardhmën, sepse të gjitha marrëveshjet që deri tashti i kemi bërë me SHBA-në dhe me BE-në kanë rezultuar të suksesshme”, ka thënë ai.
Më pas ai akuzoi direkt partitë rivale, LDK dhe AAK. “Edhe Rugova sot po të ishte gjallë do të qeshte me partinë e tij, duke i thënë jo Amerikës, jo BE-së. Por, edhe Haradinaj të ishte këtu do të qeshte njëjtë me njerëzit që po e udhëheqin partinë e tij”, deklaroi Thaçi. (im/shqiptarja.com)