KAVAJË - Partia Socialiste dega Kavajë me anë të një deklarate për median, ka përgënjeshtruar  akuzat e Partisë Demokratike mbi Drejtorin e Spitalit Rajonal Kavajë, Agron Beu.
 
“Dega e Partisë Socialiste në këtë qytet deklaron me përgjegjësi të plotë se gjithë çfarë u deklarua nga PD janë të pavërteta dhe të pabazuara ligjërisht, madje tejkalojnë çdo normë të etikës dhe informimit me transparencë të opinionit publik”, thuhet në deklaratën e PS.
 
Sipas degës së PS, “ndaj Agron Beut, me detyrë aktuale Drejtor I Spitalit Rajonal Kavajë nuk egziston asnjë vendim gjyqësor, lidhur me akuzën e korrupsionit dhe të asnjë akuze tjetër”.
 
“Në shkresën që tund para kamerave partia e deputetit që iku me turp nga Kavaja, Sali Berishës, thuhet shprehimisht se prokuroria e rrethit gjyqësor Vlorë ka vendosur pushimin e çështjes ndaj Agron Beu, sepse e gjitha ishte një montazh politik”, theksohet në deklaratën e PS-së së Kavajës.
 
Dega e PS-së në Kavajë ka akuzuar ish-kryeministrin Berisha se, kur ishte në pushtet e kishte mbushur administratën me njerëz të dënuar nga drejtësia me vendime të formës së prerë.
 
“Na duhet t’i kujtojmë ish-deputetit të Kavajës, Sali Berisha, si autor i shpifjeve të njëpasnjëshme dhe përpjekjes së dështuar për të destabilizuar opionin publik në Kavajë, se ka qenë ai,  që kur ka qenë kryeministër i mbushi zyrat në Kavajë me individë me precedent penal, madje edhe të dënuar me vendime të formës së prerë të gjykatave mbanin poste të larta drejtuese në administratën e Sali Berishës.  Sot ata janë arratisur nga Kavaja për ti shpëtuar drejtësisë”, thuhet në deklaratë.
 
“Partia Demokratike dhe Sali Berisha janë burime të fyerjeve dhe shpifjeve për të krijuar pasiguri. Partia Socialiste, bashkia dhe Qeveria jonë janë të vendosura për të Rilindur me shpejtësi Kavajën e Shqipërinë, për të sjellë progres, siguri, inovacion”, përfundon deklarata e PS-së së Kavajës.
 
Redaksia online
(ac/shqiptarja.com)