Publikimi i projektit me kulla në selinë e PD, Bardhi kërkesë për informacion Bashkisë së Tiranës: Kur është dorëzuar dhe kush ka qenë financuesi

Sekretari i Përgjithshëm i PD-së, Gazment Bardhi i ka dërguar një kërkesë për informacion Bashkisë së Tiranës pas publikimit të projektit me kulla që do të ndërtohen në territorin e selisë blu.

Bardhi i drejton 4 pyetje Bashkisë së Tiranës, ku kërkon të dijë se kur është dorëzuar zyrtarisht projekti, kush është propozuesi apo financuesi, cila ka qenë procedura e ndjekur nga Bashkia për trajtimin e tij si dhe ka kërkuar t'i vihet në dispozicion praktika e plotë shkresore që disponon Bashkia Tiranë lidhur me projektin “Four Freedoms Park.

 "1. Kur është dorëzuar zyrtarisht projekti “Four Freedoms Park” pranë Bashkisë Tiranë, dhe kush kanë qenë propozuesit/financuesit e këtij projekti? A ka pasur gjatë ditëve të fundit një përpjekje nga propozuesit e projektit apo persona të tjerë për riaktivizimin e këtij projekti? 2. Cila ka qenë procedura e ndjekur nga Bashkia Tiranë lidhur me trajtimin e këtij projekti? A ka pasur një prezantim të këtij projekti pranë zyrave të Bashkisë Tiranë? Nëse po, kush kanë qenë pjesëmarrësit privatë dhe institucionalë gjatë këtij prezantimi? Kujt i është njoftuar ky projekt deri më tani? 3. A ka pasur një vendimmarrje lidhur me këtë projekt? Nëse po, ju lutem të na vini në dispozicion aktet përkatëse, duke na sqaruar edhe cili është statusi aktual i këtij projekti dhe nëse sipas rregullave në fuqi të planifikimit të territorit a lejohet ndërtimi në zonën e propozuar? 4. Ju lutem, na vini në dispozicion praktikën e plotë shkresore që disponon Bashkia Tiranë lidhur me projektin “Four Freedoms Park”, nga momenti i dorëzimit të tij deri në datën e marrjes së kësaj kërkese", thuhet në letrën që Bardhi i ka dërguar Bashkisë së Tiranës.

LEXO EDHE:
Asgjë e re nga fronti i Perëndimit për të korruptuarit dhe “non gratat”

Report Tv zbuloi disa ditë më parë një projekt për ndërtimin e tre kullave luksoze dhe gjigante, pikërisht në vendin ku ndodhet sot selia e Partisë Demokratike, më parë Shtëpia e Oficerëve, por që u tjetërsua në vitin 2013 nga Sali Berisha, para largimit nga pushteti, në bashkëpunim me ish ministrin e Brendshëm Flamur Nokën dhe ish Presidentin Bujar Nishani.

Projekti është bërë nga një studio arkitekturore indiane, NBM Media, ndërsa përshkruhet vendi i zbatimit, mes Parlamentit, Xhamisë dhe Kishës Katolike, që përkon pikërisht me selinë e PD-së. E themeluar në vitin 1995, studioja indiane konsiderohet më e madhja në industrinë e ndërtimit në Indi dhe Azinë Jugore. (Linku i projektit).

Në përshkrimin e projektit thuhet ndër të tjera se projekti parashikon “një hotel të klasit botëror, apartamente luksoze dhe zyra komerciale, dyqane dhe parkim të bollshëm. Për më tepër, hapësira jashtëzakonisht të larmishme në natyrë, kopshte të bukura të gjelbëruara dhe zona inovative për shikimin e njerëzve, ky zhvillim arkitektonik mahnitës me përdorime të përziera do të bëhet një destinacion historik në Tiranë, por gjithashtu do të shërbejë me krenari si vitrinë e botës”.

TAG:
• bashkia tirane
• PD
• Selia e PD
• gazment bardhi