Punë të mbarë

U betua qveria e dytë e Edi Ramës dhe ne shqiptarët nuk duhet të humbim traditën e fjalëve të mira që në fillim: Punë të mbarë! Të gjithë duhet të jemi të interesuar, të majtë e të djathtë, shqiptarë të diasporës e qytetarë të Shqipërisë, që çdo gjë të shkojë bukur e mbarë.

Edi Ramën e njohim të gjithë mirë, njohim punën e tij, familjen e tij, madje, njohim edhe atë që e tij nuk është e që të tjerë ia kanë veshur si portret. Përtej të gjithave, ajo që duhet të na interesojë është vetëm një gjë: Puna që ai ka bërë dhe do të bëjë në Shqipëri. Dhe Edi Rama ka një "ves": punon, e mendoj se për këtë "ves" u rizodh. Duket si një gjë e parëndësishme, por në Shqipërinë tonë të pasdiktaturës kemi patur e vazhdojmë të kemi një problem: të shtrohemi në punë, të ndërtojmë, të kemi rezultate konkrete; jo se nuk e bëjmë, por vonojmë, sorollatemi, harrojmë.
Në 4 vitet që vijnë, pas punëve të mëparshme, na duhet të kemi Shtetin që ende na mungon, një Shtet që të ruajë e të respektojë mirë të drejtat dhe lirinë e njeriut, si dhe të garantojë mirëqënien sociale me transparencë, drejtësi e ndershmëri. Duken fjali patetike, të tepërta për t'u thënë, por të kalojmë nga Shteti fis/klan/miqësi i postdiktaturës, në një shtet me ambicje dhe standarde perëndimore, këtë gjë, ëndërrojmë ende ta realizojmë. Një shtet i qytetëruar, ende na mungon.

Vlerësoj veprimet e para të Presidentit Ilir Meta. Pas disfatës elektorale të LSI-së, pas prishjes së aleancës për ndarjen e pushtetit, pritej një "hakmarrje" e tij. Një pengesë në çdo hap, por nuk po e bën. Dekretoi kabinetin e ri, Qeveria u betua dhe tani mund të punojë.

Nuk mund të parashikoj ditët që do të vijnë. Jemi në Shqipëri dhe mund të ndodhë çdo gjë: Ne ende jemi ata që dashurojmë si të marrë, e po si të marrë urrejmë. Por fryma, vizioni kanë rëndësi që gjërat të shkojnë mbarë. Sikur seicili prej nesh të zgjohet në mëngjes me qëllimin e dëshirën për të bërë një punë të mirë, askush nuk humb gjë, të gjithë do të fitojmë. Pengesat, stërkëmbëshat që mendohen t'u vihen të tjerëve, dihet, herët a vonë, arrijnë të rrëzojnë, kë i mendon.

Punë të mbarë Qeverisë, që shpresojmë e urojmë të jetë përbërë, nga shqiptarë të mirë.