Punimet në Bypass-i Fierit dëmtojnë kanalet vaditëse/ Banorët: Po na thahen prodhimet bujqësore

FIER-Vënia në funksion e njërës korsi të autostradës se Fierit ka lehtësuar trafikun e lëvizjeve të mjeteve në rrugën nacionale Fier -Levan dhe brenda qytetit, por ka krijuar një tjetër problem. Gjatë punimeve janë dëmtuar kanalet e sistemit ujitës të tokave bujqësore, duke sjellë probleme serioze për për fermerët e fshatrave që ndodhen përgjatë saj. Ky shqetësim është ngritur nga fermerët e fshatrave Grecalli, Daullas dhe Mujalli.

Sipas tyre, kanalet kryesore janë të tejmbushur me ujë, por ai nuk shkon në parcelat e kultivuara për shkak të dëmtimit të plotë të kanaleve dytësore. Kjo sipas banorëve po çon në tharje të prodhimeve bujqësore pasi mungon uji për vaditje.

"Ujë ka plot, por janë prishur kanalet. Prodhimi po digjet, s'bëhet as misri, asgjë. InshAllah mbaron autostrada dhe të bëhen këto veprat e artit si kanalizimet"

"Autostrada mirë është bërë, por kanalizimet u prishën e nuk kemi ujë për prodhimet. Na janë tharë të gjitha prodhimet. Dhe mbikalim nuk ka, siç e shihni dhe vete rruga është shumë e rrezikshme. Shpresojmë që të bëhen kanalet vaditëse se po na i nxjerrin tokat jashtë funksionimit", shprehen fermerët.

Ata kërkojnë nga autoritet përgjegjëse që gjatë kryerjes së punimeve për përfundimin e autostradës të rishikojë edhe  kanalet ujitëse për t'iu rikthyer funksionin e mëparshëm.

B.K./r.k./Shqiptarja.com

TAG:
• Fier
• uji i pijshëm
• fermerë