Punonin si agjentë të fshehtë për Izraelin, Irani dënon me vdekje 5 persona! Mes tyre edhe një grua

Pesë iranianë, katër burra dhe një grua, në qytetin veriperëndimor të Iranit, Urmia, janë dënuar me vdekje nga një gjykatë pasi dyshohet se janë përfshirë në bashkëpunimin e inteligjencës dhe aktivitetet e spiunazhit në përfitim të Izraelit.

Hengaw, një grup me bazë në Norvegji që monitoron shkeljet e të drejtave në rajonet kurde të Iranit, tha se një nga të dënuarit me vdekje është Mansur Rasuli, marrja në pyetje e të cilit nga agjentët e Mossad në Iran u bë kryefjalë vitin e kaluar.

Të paktën pesë persona të tjerë janë dënuar me burgime të përjetshme në këtë rast, shtoi raporti.

Vitin e kaluar, media izraelite raportoi se agjentët e shërbimit të sigurisë Mossad kapën dhe morën në pyetje një pjesëtar të Korpusit të Gardës Revolucionare Islamike brenda Iranit.

Më vonë, u publikua një video në të cilën një person i cili u identifikua si Rasuli pranoi se donte të vriste një diplomat izraelit që punonte në konsullatën e vendit në Stamboll, si dhe një gjeneral amerikan të vendosur në Gjermani dhe një gazetar në Francë.

Irani dhe Izraeli kanë qenë të përfshirë në një luftë “të ftohtë” shumëvjeçare. Tensionet i janë afruar pikës kulminante vitet e fundit.

Tensionet janë ndezur gjithashtu midis dy vendeve pasi negociatat që synojnë ringjalljen e marrëveshjes bërthamore të vitit 2015 midis Iranit dhe fuqive botërore mbeten të bllokuara. Në mungesë të një marrëveshjeje që do të frenonte aktivitetet bërthamore të Iranit në këmbim të heqjes së sanksioneve të SHBA-së, Teherani ka reduktuar angazhimet e tij dhe ka zgjeruar aktivitetet e tij bërthamore.

B.V/Shqiptarja.com

TAG:
• iran
• Izrael