Pushuesit kthehen nga plazhi në të njëjtën orë/ Trafik i rënduar në disa akse...'mesazhe' optimiste për turizmin pas COVID-it

Edhe në qytetin e Pogradecit nuk ka munguar trafiku. Në videon e sjellë në redaksinë e Report TV, sikur të mos mjaftonte shiu, pushuesit janë përballur edhe me radhë të gjata makinash.

Përgjatë aksit nacional Sarandë - Gjirokastër pasditen e sotme është vënë re një fluks i shtuar automjetesh me të cilat ktheheshin pushuesit që gjatë fundjavës kanë preferuar të pushojnë në Sarandë. Megjithatë, siç shihet në videon e sjellë nga Report TV, ndryshe nga akset e tjera, nuk ka pasur trafik të rënduar.

Dita e djelë ka sjellë fluks automjetesh në aksin Shëngjin-Lezhë, pasi pushuesit kanë kaluar fundjavën në plazh dhe po kthehen në shtëpitë e tyre.

Trafiku i renduar ka nisur që prej orës 17:00 dhe vijon ende, duke krijuar radhë automjetesh deri në 5 kilometra. Për të krijuar lehtësi në lëvizje policia ka devijuar qarkullimin në një rrugë dytësore në lagjen "Xhenjo". Plazhi i Shëngjinit është një ndër më të bukurit e detit Adriatik, ku pushues të shumtë vendas dhe të huaj kalojnë fundjavën apo pushimet aty. Pjesa më e madhe e pushuesve janë ditorë dhe shumë pak janë ata që po kalojnë pushime të gjata për shkak të përhapjes së COVID-19.

Radhëve të gjata, kilometrike nuk i kanë shpëtuar as pushuesit që kanë zgjedhur që fundjavën ta kalojnë në jug. Gazetari i Report Tv, Armand Xhelili raporton se rreth orës 19:30 ka pasur trafik të rënduar në aksin Orikum- Vlorë. Duket se shumë pushues kanë zgjedhur këtë orar për t'u kthyer në shtëpi, duke shkaktuar trafik të rënduar.

Dhjetëra pushues kanë zgjedhur orët e pasdites për t'u rikthyer nga plazhit, duke shkaktuar kështu një trafik të rënduar.  Siç shihet në videon që Report Tv sjell, te Shkëmbi i Kavajës radha e automjeteve të pushuesve që kthehen nga plazhi është shumë gjatë. Kjo është kthyer në një pamje krejtësisht normale gjatë fundjavës, ku pushuesit për shkak të temperaturave të nxehta i janë drejtuar bregdetit shqiptar.