Reshjet e 30 nëntorit bënë që shumë ura të shemben në mbarë vendin, e tillë është edhe ura e 3 krojeve e cila lidh zonën e Qafë Shtamës me Krujën. Kjo urë dhe një pjesë e segmentit rrugor është ndërtuar në vitin 2014. Kanë mjaftuar pak orë reshje që kanë marrë me vete urën. Për një periudhë rreth një javë banorët e katër fshatrave mbetën të bllokuar pasi firma e cila është e kontraktuar për mirëmbajtjen e segmetit rrugor Krujë-Qafshtamë nuk është dukur gjëkundi.

"Këtu është shkatërruar çdo gjë, po na shemb si fshat. Në një jatësi prej 3 km kanali është bllokuar komplet", tha një banor. "Ka bërë punimet firma dhe ka marrë paratë në xhep. Katër fshatra janë të bllokuar prej 2 muaj, vetëm dje ka ardhur një fadromë. Jemi 1500 banorë", tha një tjetër banor. 

Për sajimin e një ure të re është dashur të kryhen punime nga një firmë private e ujit e cila ka ndërtuar një urë provizore. Por firma e ka ndërtuar këtë by-pass me fondet e veta, ndërkohë që pret nga Shteti të paktën një rimbursim, i cili ende nuk duket në horizont. Banorët shprehen se situata është mjaft problematike pasi rrëshkitja e dherave ka vijuar, çka ka sjellë edhe bllokim të rrugës. 

"Shumë herë ka pasur rrëshqitje dherash, bllokim rrugësh, kemi ndenjur dy javë të bllokuar prej kësaj urës këtu", tha një i ri. "Si kryetar fshati e kam bërë problem në prokurori por s'kam gjetur zgjidhje", tha kryeplaku i fshatit. Ndërkohë që për ndërtimin aksit rrugor të aksit Qafë Shtamë-Krujë janë investuar rreth 37.5 milion euro. Fondet për ndërtimin e saj u siguruan nga BERZH, por tenderi për ndërtimin e këtij aksi rrugor iu besua Fondit Shqiptar të Zhvillimit.

Redaksia Online
l.q/Shqiptarja.com