Qefalia në emisionin "Tetë a Tetë":
Do ndërhyhet edhe në zona të tjera

I ftuar në emisionin Tetë a Tetë, deputeti i Partisë Socialiste Xhemal Qefalia u shpreh se ndërhyrja në Lazarat nuk është një ngjarje spontane, por një operacion i mirëstudiuar.
 
Lazarati është në qendër të ditës, të gjitha mediat e kanë në qendër të vëmendjes
 
“Është një situatë që kërkon një solidaritet jo vetëm nga media por edhe nga opinioni publik pasi policia po vijon të përballet me një bandë kriminale”-tha Qefalia duke shtuar se “Kjo nuk është një ngjarje spontane, por një operacion i mirëstudiuar, pasi janë zhvilluar disa takime në shkollat e Lazaratit, dhe krerët lokalë.  Ky veprim i sotëm i fundit kur nuk arrihen negociatat.”
 
Qefalia ka folur edhe për mos reagimin e deritanishëm të opozitës për aksionin e policisë në Lazarat. “Kemi një opozitë që ka krijuar aleancën kundër drogës dhe nuk reagon.”-shtoi Qefalia duke theksuar se mos ndërhyrja e qeverisë së kaluar në Lazarat për të treguar një imazh të keq të Shqipërisë.
 
Qefalia ka bërë të ditur se pas Lazaratit Policia e Shtetit do të  ndërhyjë edhe në zona të tjera të vendit për eliminimin e zonave ku kultivohet kanabisi. “Lazarati është bërthama e evidentuar, kjo nuk do të thotë që nuk do luftohen zonat e tjera” –tha Qefalia.
 
Ndërhyrja në këtë moment sipas Qefalisë nuk bëhet për të ndikuar te Evropianët për statusin por për të hequr njollën e keqe që ka krijuar Lazarati.
“Në progres-raportin e fundit evidentohet bashkëpunimi i policisë së shtetit me vendet fqinje për të luftuar trafikimin e drogës.”- ka sqaruar Qefalia
 
Në përfundim të intervistës me gazetarin Artur Nura në emisionin “Tetë a Tetë” Qefalia ka folur edhe për incidentin që ka pasur disa ditë më parë me deputetin demokrat, Genci Strazimiri.
 
“Një veprim që nuk jep një impakt pozitiv në opinionin e gjerë. Më kanë shqetësuar etiketime për t’i dhënë ngjyra politike ngjarjes. Nuk kam gjë me Strazimirin, por me ata që duan të përfitojnë politikisht.” –tha Qefalia duke shtuar se “Ngjarja ka rrjedhur në mënyrë të menjëhershme. Si veprim është i dënueshëm.”
 
Redaksia Online
(a.h/shqiptarja.com)

TAG:
• lazarat