Hidhet guri i themelit për Qendrën Kulturore për Fëmijë! Margariti, Rama dhe Veliaj në kantier: Kultura prioritet! Hapet konkursi për muzeun ‘Besa’

TIRANË- Një tjetër kantier i hapur për ndërtimin e institucioneve të kulturës... Pranë Parkut të Liqenit, në rrugën Dora D’istria, ministria e Kulturës Elva Margariti, kryeministri Edi Rama dhe kryebashkiaku Erion Veliaj, hodhën përballë fëmijëve, gurë themelin për ndërtimin e Qendrës Kombëtare të Kulturës Për Fëmijë dhe Bibliotekës Kombëtare...

Në fjalën e tij kryeministri Rama, ndërsa theksoi se Qendra Kulturore për Fëmijë, do të jetë ndër më të mirat në rajon, nënkuptoi një pritje më të gjatë për ndërtimin e Bibliotekës Kombëtare.

‘Ishte e paimagjinueshme që fëmijët të mos kishin një qendër të denjë artistike dhe kulturore, një teatër të denjë kukullash, por vazhdonin të frekuentonin teatrin e vjetër i cili edhe tani i është nënshtruar një rikonstruksioni të plotë dhe një restaurimi bashkë me rikonstruksionin, pasi është monument kulture i mbrojtur. Mirëpo jo të gjitha gjërat mund të bëheshin menjëherë, jo të gjitha mundësitë i kemi sa ç’kemi nevojat të cilat janë në proporcione shumë më të mëdha sesa mundësitë. Megjithatë ja ku i erdhi dita edhe kësaj vepre të re, e cila siç e patë dhe nga prezantimi jo vetëm do të jetë një hapësirë me të gjitha kushtet për fëmijët, por do të jetë një tjetër shenjë e rëndësishme arkitektonike, një tjetër vepër ikonike e transformimit dhe e modernizimit të Shqipërisë, të kryeqytetit dhe patjetër edhe të një territori të tërë si ky ku faktikisht kjo godinë do të jetë një vlerë e shtuar sëbashku, shpresoj së shpejti dhe me Bibliotekën e re Kombëtare, që është një tjetër projekt fantastik, por që siç na duhet të çlirojmë rrugën e zënë nga drejtësia e korruptuar me truallin në anën tjetër, ashtu na duhet edhe të sigurojmë financimin masiv që ka nevojë gjë që jam i bindur do të arrijmë ta bëjmë në një kohë të arsyeshme. Shumë faleminderit të gjithë atyre që kanë ardhur këtu nga komuniteti dhe shpresoj që në kohën e parashikuar, mbase dhe pak më shpejt të rimblidhemi këtu për të çelur dyert e kësaj qendre e cila siç edhe një sërë veprash të tjera në fushën e kulturës, në fushën e sportit, në fushën e arsimit do të jetë nga më të bukura, në mos më e bukura e këtij lloji në rajonin tonë.’- u shpreh Rama.

LEXO EDHE:
Kreshnik Spahiu në REPORT TV: Personazh i vitit janë ‘Tifozat Kuqezi’, që emocionuan miliona europianë në Euro 2024!

Krahas Galerisë së Arteve Kombëtare, restaurimit të Muzeut Historik apo të objekteve të tjera si Salla e Koncerteve në Universitetin e Arteve, që u cekën gjatë inaugurimit, kryeministri Rama u ndal edhe tek një tjetër kantier i hapur, gurë themeli i të cilit u hodh në fund dhjetor të vitit që lamë pas...

Për rikthimin apo krijimin e hapësirave e pronave publike për qytetarët, kryebashkiaku Veliaj, tha se njësoj si në rastin e këtij trualli, betejat do të çoheshin deri në zgjidhje. Ndërsa godina e ish Parlamentit të parë shqiptar që shërbente si Teatër Kukullash është në proces restaurimi, projekti multifuksional pranë Gardës, do t’i dedikojë Qendrës Kulturore për Fëmijë më shumë hapësirë si dhe ambiente për punëtori, kafeteri apo salla moderne provash.

Po ashtu, u  hap edhe thirrja për konkursin kombëtar për “Muzeun Besa”, që do të ndërtohet në Banesën e Libohovitëve, për të promovuar, përmes takimeve, fakteve apo objekteve këtë vlerë të popullit shqiptar.

Investimi do të jetë pjesë e Tirana Park Extention, duke shërbyer si një pol kulturor multifunksional, dedikuar fëmijëve të grup moshave 3-12 vjeç, për të zhvilluar aftësitë e tyre, për t’i qasur me librin, për të nxitur ndjenjën komunitare; etj. Projekti synon krijimin e 5500 m2 sipërfaqe të shfrytëzueshme për aktivitete social-kulturore, ku përfshihen sipërfaqe skenike, performuese, klasa aktrimi, kërcimi, muzikë, pikturë, skulpturë etj, si dhe ambiente ndihmëse për sallën e teatrit, punishte për skenografinë, kostumografinë, krijimin e kukullave, garderobë, ambiente teknike, etj. Vendndodhja e Qendrës, pranë Parkut të liqenit krijon mundësinë e lidhjes me natyrën, si një pjesë e rëndësishme për zhvillimin e tyre, por edhe për kulturën e ruajtjes së mjedisit.

TAG:
• edi rama
• teatri i kukullave
• Tirane
• erion veliaj

Sondazhi i ditës:

Si ka qene per ju viti 2024?

• I mire

  43.6%

• I keq

  22.6%

• As i mire as i keq

  33.8%

Vota total: 1669

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq