Paketa e ndihmës për qytetarët prej 150 milionë eurosh e qeverisë Kurti në Kosovë, ka nxitur reagimin e Partisë së Lirisë në Shqipëri.

Në një reagim në Facebook, sekretari i Përgjithshëm i Partisë së Lirisë Tedi Blushi tha se Kosova është shembulli pse Edi Rama duhet të ikë nga pushteti sa më parë, në një kohë kur shqiptarët varfërohen pasi kostoja e jetesës po bëhet më e papërballueshme. Tedi Blushi thotë se varfërimi i shqiptarëve po ndodh pasi në vend që të mbështeten, vidhen nga qeveria përmes inceneratorëve dhe koncesioneve.

“Kosova, me buxhet gati dyfish më të ulët se Shqipëria, është shembulli i duhur i drejtimit nga një Qeveri e përgjegjshme dhe patriote që mendon dhe kujdeset për xhepat e qytetarëve.

Në kushtet e kërcënimit nga kriza, Kryeministri Albin Kurti shpalli dje një paketë të re ndihme ekonomike për të mbështetur familjet në nevojë, që përfshin:

150 milion euro ndihmë për 300 mijë familje dhe rreth 600 mijë qytetarë.

Subvencionim të faturës së rrymës për ata që kursejnë energjinë elektrike.

Dyfishim të shumës së asistencës sociale për muajin shtator.

100 euro mbështetje për pensionistët.

100 euro mbështetje për studentët.

100 euro mbështetje për punëtorë të ndërmarrjeve publike.

50 euro shtesë për punëtorë të sektorit publik.

Subvencionim prej 50% të rritjes së pagës deri në 100 euro për punëtorët e sektorit privat, për 3 muajt e parë.

Ndërkohë për shqiptarët e Shqipërisë, taksat e të cilëve vidhen pa pushim me inceneratorë, koncensione dhe rrugë të florinjta, laku i varfërisë po ngushtohet dhe kosto e jetesës po bëhet më e papërballueshme, sepse Qeveria e tyre që mendon dhe kujdeset vetëm për xhepat e Edi Ramës dhe ministrave të tij, ka planifikuar:

Zero rritje reale pensionesh.

Zero rritje rrogash për administratën publike.

Zero kompensim për 67% të popullsisë që jeton me 5.5 dollarë në ditë!

Zero kompensim për rritjen e çmimeve të produkteve të shportës dhe produkteve të tjera ushqimore.

Zero kompensim për rritjen e çmimit të karburanteve!

Zero kompensim për rritjen e çmimit të ilaçeve.

Zero subvencionim për çmimin e lartë të energjisë elektrike.

Edi Rama duhet shporrur sa më parë sepse agjenda e tij është vetëm vjedhja, falimentimi dhe shfarosja e Shqipërisë!”, shkroi Blushi në Facebook.

Ndërkohë, Tedi Blushi zhvilloi sot një takim me strukturat e Partisë së Lirisë në Korçë, ku tha se do ta fillojë nga Korça betejën me qeverinë Rama.

Edhe nënkryetari i Partisë Demokratike Luçiano Boçi vlerësoi qeverinë e Kosovës për pakon financiare për të ndihmuar qytetarët ndaj rritjes së inflacionit. Në një postim në rrjetet sociale, Boçi u shpreh se në Kosovë interesi ndaj qytetarit dhe biznesit është i madh, ndërsa në Shqipëri ky interes nuk ekziston.

“Përgjegjshmëria e qeverisë në Kosovë, megjithëse shtet rishtar në raport me Shqipërinë, është e pakrahasueshme me atë në Shqipëri. Kjo shihet në shumë fusha: Ekonomi, Bujqësi, Kulturë, Arsim, Biznes. Interesi ndaj qytetarit e biznesit në Kosovë është maksimal. Në Shqipëri ky interes nuk ekziston. Vëtëm nisur nga sot, kjo gjë vërtetohet me dy realitete: Ndërsa në Kosovë miratohet një pako financiare për të ndihmuar qytetarët nga rritja e inflacionit. Në Shqipëri, jo vetëm rritet inflacioni, por shpërthejnë përtej trendit ndërkombëtar dhe çmimet”, shkruan Boçi.