Qeveria shqiptare ka përshëndetur sot në mbrëmje, konkluzionet e Këshillit të Ministrave të Jashtëm të BE-së, për Ballkanin Perëndimor.

Ministrja e Integrimit Majlinda Bregu përshëndet konkluzionet e Këshillit të Ministrave të Jashtëm të BE-së, për Ballkanin Perëndimor.

"Në konkluzionet e Këshillit vlerësohen zgjedhjet lokale të majit si konkurruese dhe transparente, duke inkurajuar vazhdimësinë e dialogut konstruktiv politik, për funksionimin e duhur të institucioneve demokratike.

Këto zhvillime pozitive thuhet në këtë deklaratë, duhet të ndihmojnë për të kapërcyer ngërcin që ka dominuar skenën politike në Shqipëri.

Sic kuptohet qartë në konkluzionet e Këshillit, problemi i vetëm që ka penguar për 2 vjet me radhë marrjen e statusit të vendit kandidat, pavarësisht pretendimeve boshe të kryetarit të Partisë Socialiste, i cili nuk pranon as sot përgjegjësitë e tij, ka qenë ngërci politik i krijuar nga mungesa e vullnetit të opozitës, për të votuar ligjet me 3/5, për t’u angazhuar në reformën zgjedhore dhe për të bashkëpunuar në plotësimin e 12 prioriteteve të BE-së.

Nëse opozita nuk do të kishte refuzuar për 2 vjet rresht bashkëpunimin me maxhorancën për përmbushjen e kriterit politik, sot statusi i vendit kandidat do të ishte realitet" shprehet Bregu.