Rama bind italianët të investojnë
në Shqipëri, ja fushat kryesore

Energjia, turizmi dhe prodhimi industrial janë fushat kryesore në të cilat sipërmarrësit italinë mund të investojnë në Shqipëri. Garancinë për këtë e ka dhënë kryeministri Edi Rama menjëherë në përfundim të vizitës së tij dy ditore në shtetin fqinj. Kreu i qeverisë gjatë kthimit të tij nga vizita dy ditore me në fokus biznesin,  shprehu optimizmin e tij për interesin real që arriti të siguronte nga investitorët italianë.

Gjatë takimeve të zhvilluara Rama ka joshur investitorët me taksimin e ulët për biznesin duke i siguruar se ky është momenti i duhur për të investuar në Shqipëri. “Ne kemi një taksimin shumë të ulët për bizneset dhe një burokraci që nuk ekziston dhe kështu që ky është momenti i duhur për sipërmarrësit italianë që të investojnë në vendin tonë. Unë jam i bindur se ata që lidhin marrëdhëniet me Shqipërinë nuk do të heqin më dorë”, ka deklaruar Rama.

Kryeministri, gjithashtu është shprehur i kënaqur për takimin e zhvilluar dy ditë më parë me Presidenten e Rajonit në Fruili Venezia Giulia, Debora Serrachiani dhe me sipërmarrësit e zonës. Kreu i ekzekutivit theksoi se Shqipëria do të bëj të gjitha përpjekjet që të ndërtojë marrwdhënie të forta dhe të qëndrueshme me këtë rajon.

Gjatë një takimi në kantierin e Monfalcones, kryeministri nuk la pa përmendur edhe vizitën e kësaj të diele që Papa Françesku zhvilloi në Shqipëri, duke e cilësuar këtë fakt si një faktor që do të ndihmojë në përmirësimin e vendit dhe realizimin e reformave mjaft të rëndësishme. ”Ballkani nuk e gëzon një reputacion të mirë ndërkombëtar.

Për të tërhequr investime të huaja, ne kemi nevojë të përmirësojmë këtë imazh. Ne e dimë se kemi nevojë për të modernizuar vendin tonë. Dhe vizita e fundit e Papës do të ndihmojë Shqipërinë për t’u përmirësuar”, u shprehur Rama. Muaji shtator ka qenë një muaj tejet i ngarkuar për kryeministrin, brenda të cilit ka zhvilluar një sërë takimesh me liderët kryesorë botërorë.

Krahas këtyre takimeve, Rama ka lobuar dhe ka ftuar të gjithë sipërmarrësit e huaj të investojnë në Shqipëri. Në këtë kuadër ishte edhe vizita e pak ditëve më parë në Kinë në të cilën u arrit të nënshkruheshin marrëveshje të rëndësishme ekonomike.

Shkrimi u botua në gazetën Shqiptarja.com (versioni print) më 28.09.2014

Redaksia Online
(Shqiptarja.com)