Rama: Gjykatësit po e shtynë
Sarandën në një humnerë

Kreu i opozitës, Edi Rama, gjendej sot në Sarandë për të promovuar librin e tij të fundit, “Kurban”. Përshtypjet dhe komentet e tij, Rama i ka publikuar në hapësirën e tij në rrjetin social Twitter. Duket se Rama ka ngelur më se i kënaqur nga takimi.

“Promovimi u kthye në një bashkëbisedim të ngrohtë e shumë interesant për shkak të Sarandës që është personazh i librit” shprehet Rama.

Kreu socialist ka gjetur edhe hapësirën për të komentuar “masakrën” e ndërtimeve të Sarandës, duke sulmuar në radhë të parë gjykatësit e qytetit.

“Gjykatësit në Sarandë mbështesin ndërtimet shkatërruese duke zmbrapsur kryebashkiakun dhe shtyre Sarandën në humnerën e vetasgjësimit” shkruan Rama.


Rama ka ironizuar gjithashtu edhe kryeministrin Berisha dhe kryetarin e LSI-së, Ilir Meta gjatë promovimit të librit.

“Berisha gënjen kur thotë se nuk e ka lexuar librin. Por sa për Metën e besoj plotësisht që nuk e ka lexuar pasi Meta nuk lexon libra. Saliu është për të ardhur keq e ka lexuar librin dhe thotë se nuk e ka lexuar. Metën e besoj kur thotë se nuk e kam lexuar, ai nuk lexon libra”, është shprehur kryesocialisti.

Rama duke folur më tej për gjendjen në Shqipëri ka theksuar se drejtësia është kapur nga pushteti dhe se institucionet e saj nuk po japin drejtësi.

“Në Shqipëri nuk ka demokraci dhe shtet të së drejtës pasi është rrëzuar drejtësia që është trau kryesor i saj”, tha Rama në Sarandë.