Kryeministri Rama ka inspektuar punimet segmentin Vorë-Fushë Krujë, ku po investohen 4.9 milionë euro.
Ky është rindërtim goxha i thellë dhe i domosdoshëm, sepse ishte një nga akset më të shpartalluar, ndërkohë që është aks kombëtar, për momentin, deri kur të ndërhyjmë në mënyrë rrënjësore me ndërtimin e të gjithë rrugës së re Kashar-Thumanë, pastaj lart deri në Balldren dhe të krijojmë një rrugë të standardeve siç dimë ne.
Edi Rama
Kreu i qeverisë tha se kjo është një ndër akset e tjera të rëndësishme ku po ndërhyhet, duke kujtuar Rrugën e Arbrit dhe Burrel-Klos. “Klosi, - u shpreh Kryeministri, - që në kohën kur kishte shkel shoku Enver atje, s’kishte vënë dorë më as njeri, vetëm për të shkuar për të ngritur gishtat e demokracisë. Edhe rruga e Arbrit po ecën shumë mirë”. Drejtori i Autoritetit Rrugor tha se deri më tani për Rrugën e Arbrit janë kryer 20% e punimeve.
Rruga e Arbrit deri tani është me ritme shumë të kënaqshme. Jemi diku mbi 20 e ca për qind punime të kryera. Shumë afër fillojmë dhe Milot-Balldren dhe Thumanë-Kashari dhe me këto, i gjithë aksi merr formë përfundimisht, bashkë me të gjithë elementët, deri në Balldren ku shmanget ajo rrëmuja dhe gjithë ajo situata e pakëndshme që është krijuar në hyrje të Lezhës.
Afrim Qëndro Kreu i ARRSH
Kryeministri Rama nënvizoi gjithashtu nevojën e zgjidhjes përfundimtare të problemit të ujërave në autostradën Tiranë-Durrës, që sollën përmbytje një vit më parë.