Prodhuesit e ekselencës tradicionale tashmë i kanë produktet të mbrojtura e të certifikuara, si vlerë e shtuar e markës “Made in Albania”. Kryeministri Edi Rama ndau në rrjetet sociale dëshmitë e eskpertëve të ushqimit dhe vetë prodhuesve mbi përfitimet që sjell certifikimi i produkteve.

Puna për identifikimin, regjistrimin dhe mbrojtjen e produkteve bujqësor dhe ushqimore ka filluar vite më parë, por miratimi i ligjit dhe akteve nënligjore për skemat e cilësisë së produkteve bujqësore dhe ushqimore i hapën rrugë njohjes dhe certifikimit të tyre me tre sisteme krysore të përafruara me BE-në si treguesi gjeografik, emërtimi i origjinës dhe  specialiteti tradicional i garantuar.

Deri më sot është bërë identifikimi i mbi 40 produkteve që kanë potencialin për t’u certifikuar shumë shpejt.

Ministrja e Bujqësisë dhe Zhvillimit Rural, Frida Krifca u shpreh se certifikimi është garanci për aksesin në treg të prodhuesve të vegjël.

“Ministria e Bujqësisë dhe Zhvillimit Rural ka zhvilluar rrugën e qartë ku duhet të ecin këta prodhues të vegjël për të rritur vlerën e produkteve të tyre”, tha ajo.

Sipas ekspertit të ushqimit, Armand Kikino “pas një pune disavjeçare janë certifikuar produktet e e para tradicionale, certifikim që konfirmon dhe plotëson identitetin e produktit, i jep garanci konsumatorit mbi origjinën dhe cilësinë e tij si dhe i siguron prodhuesit një treg të mirë dhe çmim të drejtë. “Komisioni i Skemave të Cilësisë fton të gjitha bashkësitë e prodhuesve të bëhen pjesë e këtyre skemave”, tha ai.