Rama drejt rikandidim të Ervin Demos në Berat: Ka bërë punë shumë të mira! Porti i Durrësit? Do ndryshojë pozicionin e vendit në Mesdhe

BERAT- Porti i Durrësit është shndërruar në kryefjalë të politikës, e për këtë është ndalur të flasë edhe në Berat kryeministri Edi Rama. Përtej kritikave e akuzave që vijnë nga opozita, Rama këmbënguli që do t’i shkohet deri në fund këtij projekti. Ai solli një krahasim me rastin e Malit të Zi, ku tha se ndërtimi i një porti detar ka ndikuar në përmirësimin ekonomik të vendit. Për Ramën, e njëjta gjë do të ndodhë edhe me Shqëiprinë.

“Shikoni sot Malin e Zi. Mali i Zi ende sot me pagat më të larta në rajon, prej kohësh, prej disa kohësh. Pse Mali i Zi ka pagat më të larta në rajon? Çfarë ka Mali i Zi? Nuk ka ndonjë industri nxjerrëse, nuk ka ndonjë veprimtari të madhe. Sepse Mali i Zi ka ndërtuar shumë vite më parë një port që është shumë më i vogël sesa ky që do bëjmë ne, që është shumë më pak atraktiv sot, në kontekstin e sotëm, por që në atë kohë ishte një portë e madhe e hapur në Mesdhe, e re, e cila bëri pikërisht këtë që po iu them; e ngriti Malin e Zi në një nivel tjetër dhe e shkëputi komplet nga gjithë pjesa tjetër e rajonit, duke bërë që përmes kësaj porte të hyjnë turistë që shpenzojnë shumë dhe të hyjnë investime që sjellin shumë më tepër punësim cilësor dhe paga të larta.

E njëjta gjë do të ndodhë edhe me portin e Durrësit.  Ndërkohë që, ne paralelisht po ndëtojmë edhe Portin e Ri Tregtar, një port tregtar për sfidat ekonomike të kësaj kohe sepse porti ekzistues i Durrësit është njësoj, në të gjitha aspektet siç ishte Stadiumi Kombëtar në Tiranë që nuk pranonte të luante më asnjë skuadër e huaj dhe që UEFA dhe FIFA thanë stop. Ky është dallimi atje dhe nuk diskutohet që ne do ta bëjmë portin Turistik të Durrësit, dhe nuk diskutohet që ne do t’i bëjmë të gjitha ato gjëra për të cilat e kemi nisur këtë rrugë dhe nuk diskutohet që për këdo që do të shikojë se ku ne do të arrijmë, mjafton të kthejë kokën dhe të shohë se nga ku ne u nisëm”, tha Rama në Berat.

LEXO EDHE:
Pushimet e shqiptarëve për festat e fundvitit, agjentja turistike për Report Tv: Vjena e Budapesti të preferuara! Egjipti më i vizituari këtë vit

Nga ana tjetër, kur politika është në “ethet” e zgjedhjeve vendore, duket se edhe Ervin Demo do të jetë një nga kryebashkiakët që do i besohet një mandat të dytë. Kjo sepse Rama foli me superlativa për punën e tij.

“Për hir të së vërtetës, jo se dua ta them për të marrë këtu ndonjë duartrokitje për Ervinin, por më vjen mirë që i dhamë drejtim më në fund edhe te shkolla ‘Babë Dudë Karbunara’ se ishte realisht e padrejtë që ajo shkollë me traditë dhe me aq shumë nxënës dhe me atë nevojë të mbetej e patrajtuar, kështu që besoj që do të bëhet aty një investim i mirë. Ervini bëri çmos për të marrë fondet nga Qeveria, tani juve bëni çmos që Ervini të bëjë punën siç duhet, është detyra juaj që ta shikoni të bëhet puna siç duhet. Por unë jam i bindur se siç janë bërë dhe falë Ervinit natyrisht shumë punë të mira këtu, do të bëhet edhe shkolla ‘Babë Dudë Karbunara’”, theksoi kreu i qeverisë.

Rama nuk i kurseu as akuzat për dyshen e aleatëve, Meta-Berisha.

“Një degë e shtrembër e pemës sonë gjenealogjike ku krijesa të mbushura me një ligësi dhe me një ankth të madh godasin vazhdimisht, helmojnë vazhdimisht, sokëllijnë vazhdimisht për t’i thënë shqiptarëve se ky vend është i mallkuar pa ua thënë drejtpërdrejt. E sot ne jemi në këto kushte, kur këta njerëz janë të ekspozuar. Nuk janë më një hipotezë. As një krahasim metaforik në të shkuarën. Janë të ekspozuar njësoj si ata që janë vënë në këtë vend në shërbim të së keqes së këtij vendi, që kur ka lindur shteti shqiptar. Janë të ekspozuar sepse këta njerëz kanë marrë para. Këtë e di gjithë bota. Këtë e dini të gjithë ju”, tha ai.

Në fund, ndalur te çështa e emigrantëvem kreu i qeverisë shtoi se nuk do të jetë e largët dita kur më shumë shqiptarë do të kthehen nga sa ikin.

Rendit zhvillimet sipas orarit:

Të Fundit Të Parat

G.MO/B.K./Shqiptarja.com

TAG:
• ervin demo
• projekti i portit te durresit
• edi rama
• Berat
• fermerët
• agroturizmi