Rama ndryshon strukturën e qeverisë, bashkon ‘Kulturën’ me ‘Ekonominë' dhe 'Inovacionin' në një ministri! Emëron në krye Blendi Gonxhen! Largohet Margariti

Kompozitori Aleksandër Peçi ka reaguar pas lajmit të largimit të Elva Margaritit nga ministria e Kulturës, pasi dikasteri që ajo kryesonte, tashmë do të jetë pjesë e ministrisë së re që do të drejtohet nga Blendi Gonxhe.

Nëpërmjet një shkrimi në facebook, kompozitori shkruan se e kishte pritur prej 3 vitesh shkarkimin e Elva Margaritit duke e konsideruar madje si një vendim të dobishëm. Ai ka publikuar edhe disa prej veprave të shkruara gjatë kohës që ministria e Kulturës drejtohej nga Margariti, të cilën e akuzoi për censurim të koncerteve dhe premierave të organizuara brenda dhe jashtë Shqipërisë. Sipas tij, Margariti nuk pati asnjë lloj vizioni për të vlerësuar Kulturën shqiptare.

"Sot në diten e shkarkimit të Elva Margaritit po postoj cover te 30 sonatave e 8 koncerteve 2/3 e të cilave ta dijë publiku se janë shkruar në kohën e Margaritit. Janë luajtur premiera brenda dhe jashtë Shqiperisë në kohën e keq "mbreterimit " në ishullin e saj të izoluar të kulturës, Janë refuzuar prej saj sic është refuzuar prej saj edhe Pianodrom, nga piano festivalet sic e kanë cilësuar të huajt me reputacion në Europë.

Janë trajtuar nga Elva nën censurën e një indiference totale këto asete kulturore nga ajo dhe kupola ishullore e saj, dhe po ti shtojmë dosjet famekeqe të Butrintit ,Polifonisë ,TKOB kompani teatrore, sallë ende e mbylluar e Universiteti i Arteve, Tirane qorr vizioni i saj per te bllokuar kulturen aty ku prodhohet kulturë, qorr - vizioni i saj për të mos integruar kurgjë nga kultura muzikore shqiptare ne Europë e Botë, qorr apati "vizioni" i saj për ti  dixheizuar ditët ndërkombetare të kulturës me një ushtri dixhiestash, qorr vizion i saj për kauzën e shqiptingujve, qorr vizioni i saj për dosien e lahutes, qorr vizioni i saj për të mos bërë asgjë ndaj reagimeve të fuqishme për dosjen e polifonise e cila me "BEKIMIN" e min kult ja dha atesinë e polifonisë sirenave greke dhe muz bizantine, qorr vizioni i saj per ti vënë ujkut melcitë në qafë duke sjellë të menaxhojnë ButrIntin ca kubaneze dhe shqiptaret që i kanë zbuluar Bylis e shumë të tjera asete arkeologjike i le në hije. Elva qe ben samite për të drejten e autorit dhe eshte e para qe e shkel e para qe ma mer pa me pyetur pa ma respektuar te drejten pa me paguar në shtepinë tone kur e përdor për në Bienalen e arkitekturës në Venezia. Po qorr vizioni i saj për të ngritur instrumenta strategjike që të jenë si ripa transmesioni ne kulturë?....

Ne fakt e kam pritur prej më shume se 3 vjetesh shkarkimin e saj që megjithëse i vonuar është i dobishëm. Këto problematike publiku i di, i kam ngritur vazhdimisht po shyqyr qe këto këmbana u dëgjuan”- shkruan kompozitori mes të tjerash në reagimin e tij.

Krijimi i ministrisë së re të Ekonomisë, Kulturës dhe Inovacionit, do të sjellë shkrirjen e ministrisë së Kulturës që ka në krye Elva Margaritin. Kjo e fundit që prej janarit 2019 shërben si ministre e Kulturës. Më herët asaj i ishte besuar detyra e këshilltares për territorin dhe të Koordinatores Kombëtare për Programin e Integruar për Zhvillimin Rural (Programi 100 Fshatrat) pranë Kryeministrit të Shqipërisë. Margariti vjen nga arkitektura dhe prej vitesh ka drejtuar disa projekte ndërsa ka qenë e angazhuar dhe si lektore në universitete.

Blendi Gonxhe i cili do të drejtojë ministrinë e Ekonomisë, Kulturës dhe Inovacionit aktualisht mban postin e Drejtorit të Përgjithshëm në Drejtorinë e Shërbimeve të Transportit Rrugor.

Në vitin 1998, ai u emërua si Shef i Kabinetit i Ministrit të Kulturës, Rinisë dhe Sporteve, ku u angazhua për zhvillimin e politikave mbrojtëse dhe të qëndrueshme të cilat u finalizuan me njohjen e Butrintit si Park Kombëtar, krijimin e Fondacionit të Butrintit (një nga zonat më të rralla për vlerat arkeologjike dhe të ekosistemeve në rajon), zhvillimin e Projektit të Bankës Botërore për turizmin elitar, ruajtjen e Zonës së Bregdetit të Jugut, si dhe shumë projekte të tjera në promovimin e artit dhe kulturës në Shqipëri.

Në vitin 2000, u emërua Nënkryetar i Bashkisë së Tiranës. Ndërsa nga Nëntori 2018, e deri më tani Gonxhe ka qenë në krye të Drejtorisë së Përgjithshme të Shërbimeve të Transportit Rrugor, institucion në varësi të Ministrisë së Infrastrukturës dhe Energjisë.

Nga Gushti 2015, Gonxhe iu bashkua ekipit të Bashkisë Tiranë të drejtuar nga Kryetari Erion Veliaj si Drejtor i Përgjithshëm i Ndërmarrjes Nr. 1 të Punëtorëve të Qytetit. Më pas, nga tetori 2015, drejtoi Agjencinë e Parqeve dhe Rekreacionit të themeluar nga Bashkia Tiranë, ku gjatë periudhës që drejtoi këtë agjenci, u ndërmorën nisma thelbësore për kryeqytetin që sollën transformimin e Parkut të Madh të Liqenit Artificial dhe rikualifikimin e objekteve publike.

Si një ndër zërat më të spikatur rinor, Blendi Gonxhe ishte ndër protagonistët kryesorë udhëheqës të Lëvizjes Studentore për Demokraci që shpejtoi fundin e regjimit më të egër komunist të Lindjes në Dhjetor 1990 dhe ndër themeluesit e partisë së parë opozitare, të erës postdiktatoriale. Në vitin 1991, udhëhoqi grevën studentore për shembjen e kulteve të diktaturës. Përgjatë viteve të angazhimit publik, Blendi Gonxhe ka themeluar dhe drejtuar shumë organizata e shoqata rinore, jo-qeveritare dhe humanitare.