Në kuadër të Javës së Zhvillimit të Qëndrueshëm në Abu Dhabi, Kryeministri Edi Rama mori pjesë në ceremoninë e ndarjes së çmimeve “Zayed” të iniciativave humanitare që kanë dhënë për ata qe kontribuojnë në vendet në zhvillim.

Çmimet u akorduan për projekte dhe organizata që kanë punuar lidhur me përmirësimin e arsimit dhe shkollimit, sigurimin e ujit të pijshëm, mbështetjen e ushqimit për komunitetet në nevojë si dhe për nisma që adresojnë ndryshimet klimatike dhe mbrojtjen e mjedisit.

Ndër personat e pranishëm, të cilit iu akordua medalja më e lartë, ishte dhe kryeministri Edi Rama.

Rama, përmes një postimi në rrjetet sociale, u shpreh se akordimi i medaljes, është respekti dhe vlerësimi më i madh për një kryeministër shqiptar, por edhe për Shqipërinë.

Postimi i kryeministrit Edi Rama

“Thellësisht i prekur  prej surprizës së paimagjinueshme dhe nderimit të jashtëzakonshëm nga presidenti i emirateve të bashkuara, Sheikh Mohammed Bin Zayed al Nayan.

Akordimi i medaljes më të lartë të vendit mik, e cila mban emrin e themeluesit të Emirateve të Bashkuara, sheikut Zayed, është respekti dhe vlerësimi më i madh për një kryeministër shqiptar, që e mora përulësisht plot me krenari për Shqipërinë, e me mirënjohje të thellë për mikun e madh të shqiptarëve, lartësinë e tij Sheikh Mohammed Bin Zayed, si edhe për çdo shqiptar që ma ka besuar udhëheqjen dhe përfaqësimin e atdheut tonë të përbashkët”, shkruan Rama.

Rendit zhvillimet sipas orarit:
Ora 19:38
Jehonë mediatike në Emirate për dekorimin e Ramës me Urdhrin e Zayed: Vlerësim për marrëdhëniet dypalëshe

Kryeministri Edi Rama dhe Sheiku Mohamed bin Zayed Al Nahyan

Mediat e Emirateve të Bashkuara Arabe i kanë bërë jehonë dekorimit të kryeministrit shqiptar Edi Rama me Urdhrin e Zayed, dekorata më e lartë civile e vendit, e akorduar nga presidenti Mohammed bin Zayed Al Nahyan.

Sipas raportimeve të agjencisë shtetërore WAM, dekorata i është dhënë Ramës në vlerësim të përpjekjeve të tij për forcimin e bashkëpunimit mes Shqipërisë dhe Emirateve të Bashkuara Arabe. Mediat theksojnë se nderimi u akordua gjatë një takimi zyrtar në Qasr Al Bahr, në Abu Dhabi.

Në raportimet e tyre, mediat emirate ndalen edhe te diskutimet mes dy palëve për zgjerimin e bashkëpunimit dypalësh, veçanërisht në fushat e ekonomisë, investimeve dhe qëndrueshmërisë, duke e vendosur dekorimin në kontekstin e marrëdhënieve mes dy vendeve.

Vizita e kryeministrit shqiptar në Abu Dhabi lidhet me pjesëmarrjen në Javën e Zhvillimit të Qëndrueshëm 2026, një forum ndërkombëtar ku trajtohen çështje të zhvillimit të qëndrueshëm dhe bashkëpunimit global.

U.D/Shqiptarja.com