NEW YORK- Me ftesë të shefit të diplomacisë së Bashkimit Evropian, Josep Borrell, më 20 shtator liderët e vendeve të Ballkanit Perëndimor do të takohen në New York. Delegacionin e Shqipërisë e kryeson kryeministri Edi Rama dhe ministrja e Jashtme Olta Xhaçka.

Ndërsa Kosovën në javën e takimeve në Asamblenë e Përgjithshme të OKB-së në New York do ta përfaqësojë presidentja Vjosa Osmani. Burimet kanë thënë po ashtu se aty do të diskutohet për situatën globale, e ndryshuar në mënyrë dramatike pas pushtimit rus të Ukrainës, por edhe për situatën aktuale në rajonin e Ballkanit Perëndimor.

Për Ballkanin Perëndimor dhe nevojën që të vazhdohet bashkëpunimi SHBA-BE pritet të flitet edhe në një takim trans-atlantik në nivel të ministrave të Jashtëm, të cilin do ta organizojë Sekretari amerikan i Shtetit, Anthony Blinken. Në këtë takim do të marrë pjesë edhe Borrell.

Gjatë qëndrimit në Nju Jork, Ministrja Xhaçka do të mbajë disa takime dypalëshe me homologët nga, Japonia, India, Finlanda etj, si dhe do të marrë pjesë në disa evente të nivelit të lartë si:

Takimi i Komisionit të Partneritetit Karta e Adriatikut - SHBA;

Takimi Ministror i Grupit Feminist për Politikë të Jashtme +;

Simpoziumi Gratë, Paqja dhe Lidershipi: Arritja e Paqes dhe Sigurisë së Qëndrueshme përmes Lidershipit të Përgjegjshëm ndaj Gjinisë.