Franca 'dritë jeshile' për negociata, Rama 'frenon' entuziazmin: Sinjal pozitiv, por të mos ushqejmë iluzione

Në përfundim të vizitës së tij në Mynih të Gjermanisë, kryeministri Rama ka reaguar pas sinjalit pozitiv që dha presidenti francez Macron, për hapjen e negociatave në mars. Rama tha për RTSH se marrja e një 'Ok' nga Franca ishte pozitive, por bëri thirrje që askush të mos krijojë iluzione të skajshme, pasi ky proces nuk është në dorë të Shqipërisë. Rama tha se qeveria do të vijojë të bëjë punë e  saj me reformat në të njëjtën mënyrë si kur Shqipëria të kishte marrë një 'PO' që në tetorin e kaluar.

'Në fakt, unë nuk e ndoqa dot Presidentin, sepse isha në takime të tjera, por nga sa mund të lexoj është një sinjal pozitiv. Megjithatë, unë dëshiroj që t’u them të gjithëve, që nuk kemi pse e ushqejmë veten me iluzione dhe me dëshira të skajshme, edhe pse shumë legjitime, sepse kjo gjë nuk varet nga ne dhe le të presim me durim. Ndërkohë të vazhdojnë me këmbëngulje dhe durim për të realizuar gjërat, ashtu siç do i realizonim nëse do të ishin hapur negociatat', tha Rama.

Presidenti i Francës, Emmanuel Macron të shtunën la mënjanë qëndrimin e tij bllokues për anëtarësimin e Shqipërisë dhe Maqedonisë së Veriut, duke u shprehur se nëse Komisioni Europian jep vlerësime pozitive në raportin e tij në mars, atëherë nga ai do të jap një "OK" për hapjen e negociatave.

Mirëpo pavarësisht kësaj deklarate, duket se Rama ka zgjedhur të jetë më i rezervuar në entuziazmin për hapjen e negociatave pas zhgënjimit që pësuan të gjithë shqiptarët, kur Franca zgjodhi të bllokonte hapjen e tyre për Shqipërinë dhe Maqedoninë e Veriut në tetor të 2019, ku pritshmëritë ishin të larta edhe nga partnerët ndërkombëtarë.

Lajmi kryesor:

Konferenca e Sigurisë në Mynih/ Rama ngacmon Macron, shpërthejnë të qeshurat në sallë (VIDEO)

/G.M./Shqiptarja.com

TAG:
• edi rama
• OSBE