Rama: Shpenzimet e afganëve s'do paguhen nga shqiptarët, por SHBA! Mund të vijnë më pak se 4000 se s'po lëvizin dot! Kush do të hyjë në punë, do i ofrojmë lehtësira

TIRANË- Një çështje që kryeministri Edi Rama është ndalur të flasë janë edhe afganët e strehuar në Shqipëri. Ai tha se për aq kohë sa ato do të qëndrojnë gjatë në vendin tonë, për gati më shumë se 1 vit, shpenzimet do të paguhen nga SHBA-ja dhe jo taksapaguesit shqiptar, siç ishte rënë dakord në fillim. Nga ana tjetër, është thënë se në Shqipëri do të vijnë 4000 afganë, por kryeministri u shpreh sot se gjasat janë që të vijnë më pak, pasi nuk po lëvizin dot.

"S'mund të jenë shpenzimet e taksapaguesve shqiptar, mund ta bënim nëse është 1-2 javë, por nëse rrinë 1-2 vjet dhe kemi pasur dakordësi që shpenzimet e qëndrimit, qeveria amerikane apo etnitete të tjera do të mbulojnë shpenzimet. Ishte variant për të ngritur kamp, unë kam thënë që kampe nuk ka. Kemi dhënë disponibilitet për 4 mijë, por mesa duket nuk do vijnë se nuk po lëvizin dot", tha Rama.

Për shkak të kohës së gjatë të qëndrimit që është parashikuar të qëndrojnë, kreu i qeverisë tha se nëse afganët duan që të punojnë, qeveria do u krijojë lehtësira.

"Nëse duan të hyjnë në punë, ne do i ofrojmë çdo lehtësi", tha Rama në 'Opinion'.

Në orët e para të mëngjesit të sotëm kanë mbërritur në aeroportin e Rinasit 37 afganë të tjerë, duke e çuar në 644 numrin total të refugjatëve që kanë ardhur në më shumë se një javë në vendin tonë. Ata janë akomoduar në Qytetin Studenti, për t'u transferuar në ditët në vijim në struktura hoteliere në bregdet. Durrësi, Lezha dhe Berati janë tre qytetet që kanë hapur dyert për akomodimin e afganëve, sepse mundësia për strehimin e tyre në kampe është përjashtuar kategorikisht nga qeveria Rama. Shqipëria ishte ndër vendet e para që u angazhua për të strehuar qytetarët afganë të cilët po largohen nga vendi i tyre, pasi u kërcënohet jeta nga talebanët.  

B.K./Shqiptarja.com

TAG:
• edi rama
• Tirane
• strehimi i afganeve ne shqiperi