Rama takon qytetarin shqiptar në Japoni: Kam 17 vite këtu, do kthehem në Shqipëri e do hap agroturizëm! Kryeministri: Do kesh më shumë se ç'të mbetet këtu

Kryeministri Edi Rama, i cili ndodhet në vizitë zyrtare në Japoni ka takuar një qytetar shqiptar i cili jeton prej 17 vitesh atje por do të kthehet në Shqipëri. Në një bisedë me Ramën që është në Hiroshima, shqiptari thotë se nuk ndihet i lumtur dhe i shkon e gjithë dita në punë. Arsyeja përse ndodhet në Japoni është martesa me një japoneze, e cila e mbështet vendimin e tij për t'u kthyer në atdhe.

Shqiptari nga Nivica, Flamurtari thotë që Shqipëria ka marrë shumë zhvillim dhe po e mendon hapjen e një biznesi në vend ndërsa kreu i qeverisë i sugjeron që të hapë agroturizëm dhe në fund do ketë më shumë të ardhura se sa i mbeten në Japoni nga puna me orar të tejzgjatur 18 orë. 

Edi Rama: Ja ku është flamuri i kudondodhur, në Hiroshima. Por nuk është vetëm flamuri, edhe flamurtari.

LEXO EDHE:
'Në rrugën drejt Shqipërisë 2030!' Turi me diasporën, Rama sot takim me shqiptarët e Londrës: Gati shqipe

Flamurtari: Është kënaqësi që na erdhe kryeminsitër dhe është kënaqësi që kudo që shkon, shqiptarët i takon.

Edi Rama: Thuaji pak nga je.

Flamurtari: Jam nga Nivica e Tepelenës.

Edi Rama: Si erdhe këtu?

Flamurtari: Jam martuar me një japoneze.

Edi Rama: Një niviciot nga maja e Kurveleshit që i mori zemrën një japonezeje. Edhe japonezja e mori me vete bashkë me zemrën.

Flamurtari: Bëj 17 vjet këtu, më mungon Shqipëria. Ju bëj thirrje të gjithë shqiptarëve që të mos largohen nga Shqipëria. Japonia është vend i zhvilluar, por është shumë e vështirë. Punoj 18 orë në ditë dhe jam shumë i vetmuar. Më mungon Shqipëria dhe do të kthehem shumë shpejt.

Edi Rama: Po thuaj pse do kthehesh?

Flamurtari: Do kthehem sepse fshati im ka marrë zhvillim që mendoj se është shumë herë më mirë se këtu ku ndodhem. Vendet e zhvilluara janë shumë të vështira. Nuk ka si Nivica. Ka rrugën, turizmi po shkon shumë mirë dhe mendoj të kthehem e të bëj diçka. Jam shumë falënderues sinqerisht për atë që keni bërë.

Edi Rama: Tani hajde hap një agroturizëm në Nivicë dhe të siguroj se do jesh më i lumtur dhe në fund të ditës do kesh më shumë se ç’të mbetet këtu.

Flamurtari: Jam mëse i sigurt për këtë.

Edi Rama: Ka ardhur koha që edhe gruaja japoneze të bëjë sakrificën e vet. Boll ndjenje me njerëzit e gruas. Të vij të rrijë ajo me njerëzit e tu tani.

Flamurtari: Bashkëshortja e di se si është Japonia dhe ka qenë në Shqipëri. Edhe thotë gjithmonë, le të kthehemi në Shqipëri. Njerëzit kanë dashuri, jetojnë të lumtur.

Edi Rama: Mos thuaj jetojnë të lumtur se do të të shajnë se të gjithë ankohen.

Vizita disa ditore e kryeministrit Edi Rama në Japoni vjen në kuadër të 42 vjetorit të marrëdhënieve diplomatike mes dy vendeve. Së shpejti Japonia do të dërgojë një të dërguar special posaçëm për rajonin e Ballkanit Perëndimor. Rama shtoi se pret që së shpejti, të firmoset marrëveshja me qeverinë japoneze që shqiptarët të lëvizin pa viza drejt Japonisë.

/KT/Shqiptarja.com

TAG:
• edi rama
• Japoni
• flamurtari