Raporti i BB-së, PD: Më negativi 
 Qeveria: Ndryshoi metodologjia

Partia Demokratike e ka konsideruar raportin e fundit të Bankës Botërore “Doing Bussines” si më negativin që ka marrë një qeveri shqiptare për ekonominë. Në raport thuhet se Shqipëria ka humbur 35 vende krahasuar me një vit më parë.
 
Deputeti Florion Mima u shpreh se vlerësimi i BB-së hedh në kosh shpenzimet e kreut të qeverisë gjatë vizitës në Hong-Kong për të tërhequr investitorë pasi sipas tij raporti është “pasaportë e zezë” për Shqipërinë.
 
“Korrupsioni skandaloz i shtrirë masivisht, klientelizmi dhe fakti që vetëm ndërtuesit e tij punojnë sot, rritja e taksave dhe, nga ana tjetër, kontrabanda e evazioni i stërmadh, represioni dhe dhuna ndaj biznesit që nuk është afër qeverisë, të gjitha këto kanë sjellë këtë rezultat dramatik. Ky është raporti më negativ që merr një qeveri shqiptare për ekonominë e vendit”, tha Mima.

Por, në reagimin e qeverisë thuhet se renditja e Shqipërisë në vendin e 97-të është ndikuar nga dhënia e lejeve të ndërtimit, marrja e certifikatës së pronësisë, si dhe pagesa e taksave dhe se pozicionimi 35 vende më pposhtë ndikohet edhe nga metodologjia e vlerësimit e cila për vitin 2016 ka ndryshuar, ndërsa në thelb Shqipëria nuk ka humbur vende në raport me vetveten.
 
Në reagimin e publikuar në faqen “transparenca.al”, lejet e ndërtimit kanë rënë pasi pas reformës territoriale, Këshilli Kombëtar i Territorit ka marrë vendimin për pezullimin e përkohshëm të lejeve të ndërtimit, me qëllim harmonizimin e instrumenteve të planifikimit lokal në kuadër të ndarjes së re administrative territoriale dhe për disiplinimin e ndërtimeve.
 
“Kjo është një qasje afatgjatë për zhvillimin urban, planifikimin e zhvillimin e territorit, planifikimin e zhvillimit të turizmit dhe zhvillimin ekonomik të rajoneve. Sidoqoftë, jemi të bindur se në raportin e vitit të ardhshëm, të gjitha reformat e ndërmarra do të gjejnë reflektim të drejtpërdrejtë në përmirësimin e indikatorit”, thuhet në reagim.
 
Gjithashtu, nënvizohet se kjo nuk është renditja më e keqe, pasi në vitin 2006 renditej e 117-a në botë,  në vitin 2007 renditej në vendin e 120-të dhe në vitin 2008 në vendin e 136-të.

Redaskia online
(s.m/shqiptarja.com)