Raporti konfidencial i OSBE
Shehi: Aty ka edhe të vërteta

TIRANË - Raporti konfidencial i OSBE që tronditi politikën shqiptare me të dhënat e tij për inkriminim e  zyrtarëve të lartë të politikës, për Dashamir Shehin nuk është i gjithi një thashetheme. Në një intervistë për televizionin tone deputeti i opozitës shprehet se në morinë e informacioneve të këtij raporti ka një bazë vërtetësie.
 
“Ka një të vërtetë brenda edhe raportit të OSBE-së.  Mes 7 thashethemeve është njëra e vërtetë.” 
 
Ai nuk sqaron nëse të vërtetat përfshijnë akuzat ndaj kolegëve të tij demokratë, apo kundërshtarëve të tij politikë. Por sipas Dashamir Shehit për të pastruar Parlamentin dhe administratën nga dyshimet për inkriminim, duhet finalizuar  projekti për dekriminalizmin. Zgjidhja më e mirë është me vullnet të përbashkët, por nëse kjo nuk vjen Shehi shpreson tek rezultatet e presionit të ndërkombëtarëve.
 
“Ose duhet që një që hyn në Parlament të jetë milioner, kjo tregon që këtu ka raporte ekstrapolitike , jashtë ligjit. Shpresoj të ketë një draft të përbashkët, e vetmja vlerë është kur bëhet bashkarisht . Sepse e kanë marrë një farë leksioni , kjo çështje u ndërkombëtarizua, nën frymën  e këtij presioni.  Kjo luftë shpresoj që të vazhdojë dhe të huajt të vazhdojnë të mbajnë temp e intensitet se jam i bindur që këto pak gjera që janë bërë janë bërë për shkak te presionit te huajve.”
 
Në kuadër të marrëveshjes se dhjetorit të 2014 në komisionin e posaçëm për dekriminalizmin, demokratët propozuan draftin e tyre me një ligj për këtë proces dhe amendimet Kushtetuese, ndërkaq vetëm pak ditë më parë qeveria doli me projektligj për këtë çështje. Opozita e konsideron të papranueshme iniciativën e qeverisë pasi ligji duhet të kalojë vetëm përmes komisionit përkatës, ndërsa maxhoranca  pritet të sjellë në kuvend iniciativën e saj për miratim.
 
Redaksia Online
(Shqiptarja.com)

TAG:
• OSBE