Një takim mes Vladimir Putin dhe Volodymyr Zelenskyy mund të ndodhë brenda tre javësh. Kjo është ajo që po shpreson Uashingtoni, sipas të dërguarit special amerikan Steve Witkoff.

Në një intervistë për Fox News, Witkoff tha se SHBA ka paraqitur propozime si për Rusinë ashtu edhe për Ukrainën dhe se pret që ato t’i afrojnë palët “në tre javët e ardhshme”. Madje, sipas tij, kjo mund të çojë edhe në një samit mes dy presidentëve.

Luftën që po shkon drejt katër viteve, ai e quajti “një luftë të kotë”. “Çfarë të jep dinjiteti kur ka kaq shumë vrasje?”, tha ai, duke shtuar se bisedimet e fundit të ndërmjetësuara nga SHBA kanë pasur efekt pozitiv në disa drejtime.

Witkoff u shpreh se as Rusia dhe as Ukraina “nuk duken sikur duan vërtet të luftojnë me njëra-tjetrën” dhe se vështirësia kryesore për marrëveshje është në nivelin e lidershipit.

Ai tha se bashkë me Jared Kushner, dhëndrin dhe këshilltarin jozyrtar të presidentit Donald Trump, kanë hedhur disa ide konkrete që mund t’i bashkojnë palët në tryezë. Sipas tij, ekziston edhe mundësia që në një takim të tillë të përfshihet edhe Trump, por vetëm nëse ai është i bindur se mund të arrihet rezultat real.

Witkoff tregoi se në takimet me Putinin, presidenti rus ka qenë “i drejtpërdrejtë” për vijat e kuqe dhe arsyet e tij. Ai mbrojti vizitat e tij të shumta në Rusi, duke thënë se për të arritur marrëveshje duhet të kuptosh pozicionin e palës tjetër.

Deklaratat vijnë pas raundit të fundit të bisedimeve trepalëshe për luftën në Ukrainë, që u mbajt këtë javë në Gjenevë. Më herët, dy raunde të tjera u zhvilluan në Abu Dhabi në fund të janarit dhe në fillim të shkurtit.

Rendit zhvillimet sipas orarit:
Ora 22:53
17 të plagosur nga sulmet ruse në Ukrainë, mes tyre 4 fëmijë! Ashpërsohen agresionet, 112 përplasje prej mëngjesit

“Sot forcat e Mbrojtjes së Ukrainës janë përfshirë në 112 përplasje me forcat ruse, me aktivitetin më intensiv, 24 sulme, në sektorin e Huliaipole. Këtë e bëri të ditur shtabi i përgjithshëm i forcave të armatosura ukrainase, sipas Ukrinform. Që nga fillimi i ditës janë regjistruar 112 përplasje.

Sipas të dhënave të përditësuara, rusët kanë kryer një sulm me raketë, kanë lëshuar 50 raketa, kanë ndërmarrë 66 sulme ajrore dhe kanë hedhur 152 bomba ajrore. Përveç kësaj, kanë përdorur 3.900 dronë kamikazë dhe kanë kryer 2.313 bombardime ndaj vendbanimeve dhe pozicioneve të njësive.

Ndërkohë raportohet se bilanci i të plagosurve nga sulmi rus në rajonin e Kievit është rritur në 17, mes tyre katër fëmijë. Këtë e bëri të ditur Mykola Kalashnyk, kreu i administratës ushtarake rajonale të Kievit.

“Mbi 100 banesa janë dëmtuar në rajon: shtëpi private dhe apartamente në pallate shumëkatëshe. Kjo shifër nuk është ende përfundimtare, pasi raportimet vazhdojnë të mbërrijnë. Dëmet prekin ndërtesa, disa prej të cilave janë shkatërruar plotësisht, me dritare të thyera, çati dhe fasada të dëmtuara. Janë goditur gjithashtu ambiente tregtare, magazina, ndërtesa zyrash, garazhe dhe mjete transporti”, tha Kalashnyk.

 

P.J/Shqiptarja.com

Ora 16:57
Lufta Rusi-Ukrainë në vitin e 4-t, Papa Leone XIV: Paqja nuk mund të shtyhet, është nevojë urgjente!

Papa Leone XIV

Lufta në Ukrainë nuk mund të presë më. Ky ishte apeli i Papa Leone XIV  sot në Sheshin e Shën Pjetrit, nga ku kërkoi që t'i jepet fundi konfliktit që ka hyrë në vitin e katërt.

Gjatë fjalimit të përjavshëm para besimtarëve, ai foli për një situatë dramatike që, sipas tij, po shpaloset para syve të gjithë botës. “Zemra ime shkon sërish tek kjo situatë. Ka kaq shumë viktima, jetë dhe familje të thyera, kaq shumë shkatërrim dhe vuajtje të pashprehshme”, tha ai.

“Paqja nuk mund të shtyhet, është një nevojë urgjente që duhet të gjejë vend në zemra dhe të kthehet në vendime të përgjegjshme. Për këtë arsye, e përsëris me forcë apelin tim: armët të heshtin, bombardimet të ndalen, të arrihet pa vonesë një armëpushim dhe dialogu të forcohet për t’i hapur rrugë paqes.”

Ai e quajti luftën “një plagë për të gjithë familjen njerëzore”, që lë pas vdekje, shkatërrim dhe dhimbje që prekin breza të tërë.

U.D/Shqiptarja.com