Raunig: Po forcohet marrëdhënia mes shtetit dhe qytetarëve

TIRANË, 12 Dhjetor /ATSH-Gjergji Mima/ - Kryetari i Prezencës së OSBE-së, ambasadori Florian Raunig, theksoi sot në takimin konsultativ për projektmanualin e pjesëmarrjes së publikut në procesin vendimmarrës të Kuvendit, i cili është hartuar me mbështetjen e Prezencës së OSBE-së, se ky është finalizimi i udhëzuesit që do të ndihmojë qytetarët të arrijnë më lehtë të zgjedhurit e tyre dhe të angazhohen së bashku me ta dhe me organin përfaqësues, Kuvendin.
"Siç jeni të gjithë në dijeni, parlamenti është institucioni qendror i demokracisë. Parlamentarët kanë përgjegjësinë të dëgjojnë zgjedhësit e tyre, t'i përfaqësojnë dhe t'iu përgjigjen nevojave të tyre në kohë dhe në mënyrë efektive. Megjithatë, për kryerjen e këtij roli Parlamenti ka nevojë për një partner aktiv - shoqërinë civile. Shoqëria civile luan një rol kritik në monitorimin e punës së parlamentit dhe për ta mbajtur atë të përgjegjshëm. Ajo duhet të luajë gjithashtu një rol thelbësor në zhvillimin e një marrëdhënie pozitive dhe transparente midis shtetit dhe qytetarëve të tij", tha Raunig.
Sipas amabsadorit Raunig, "në Shqipëri, kjo marrëdhënie po përforcohet gjithmonë e më shumë. Shoqëria civile dhe Kuvendi po fillojnë t'i shtrijnë duart njëri-tjetrit".
"Prezenca mbështet Kuvendin me një gamë të gjerë aktivitetesh që informojnë qytetarët në lidhje me funksionet e parlamentit dhe mënyrat se si ata, qytetarët, mund të marrin pjesë në vendimmarrje. Ne kemi organizuar takime të parlamentarëve me zgjedhësit e tyre dhe kemi krijuar pika informimi në ambientet publike të Kuvendit me qëllim rritjen e transparencës dhe llogaridhënies së Kuvendit, si dhe për ta sjellë atë më afër votuesve individual", tha Raunig.
Ne, vijoi amabsadori i OSBE-së, po punojmë për të nxitur një kulturë dialogu dhe gjithëpërfshirje, për të krijuar një shkëmbim pozitiv informacioni dhe opinionesh. Kjo për arsyen se sa më shumë të dijë publiku mbi aktivitetet e parlamentit, aq më mirë mund t'i shprehë preferencat e veta dhe t'i mbajë përfaqësuesit e vet të përgjegjshëm. Sa më shumë parlamentarët të dinë në lidhje me nevojat dhe shqetësimet e elektoratit të tyre, aq më shumë mund të vihen në lëvizje".
"Përpjekjet e Kuvendit tregojnë gatishmërinë për të siguruar një mjedis ku publiku të ndihet i mirëpritur; ku qytetarët mund të marrin informacion në kohë dhe ku mund të ndjekin të gjithë vendimet e marra nga përfaqësuesit e tyre. Një parlament transparent, i arritshëm, llogaridhënës dhe reagues, është një parlament më efektiv", tha Raunig. /a.ke/
 
 
 
 

TAG:
• OSBE