Raunig: Rezultate konkrete për dënimin e zyrtarëve të dyshuar për korrupsion

TIRANË -Kryetari i Prezencës së OSBE-së në Shqipëri, ambasadori Florian Raunig, kërkoi sot që të bëhen përpjekje për të arritur rezultate konkrete për dënimin e zyrtarëve publikë të dyshuar për korrupsion.
Raunig vizitoi sot mjediset e Inspektoratit të Lartë të Deklarimit dhe Kontrollit të Pasurive dhe Konfliktit të Interesave, ku pati një takim me Inspektorin e Përgjithshëm Shkëlqim Ganaj dhe me një grup inspektorësh.
Gjatë kësaj vizite Raunig theksoi se "rritja e numrit dhe e nivelit të zyrtarëve që do të kontrollohen plotësisht, numri i rasteve të denoncuara deri më tani në Prokurorinë e Përgjithshme, si edhe gjobat, tregojnë se ILDKPKI-ja po luan një rol më aktiv në përpjekjet kundër korrupsionit".
Kryetari i Prezencës së OSBE-së takohet me Inspektorin e Përgjithshëm të ILDKPKI-së
"Këto përpjekje duhet të mbështeten më tej nga e tërë korniza antikorrupsion, përfshirë qeverinë, Kuvendin dhe Prokurorinë e Përgjithshme. Ndërkohë, duhet të bëhen përpjekje duke arritur rezultate konkrete në dënimin e zyrtarëve publikë të dyshuar për korrupsion, pavarësisht nivelit dhe lidhjeve të tyre politike. Pavarësia, integriteti dhe bashkëpunimi i institucioneve, përfshirë gjyqësorin, janë thelbësore për uljen e qëndrueshme të korrupsionit dhe rritjen e besimit të qytetarëve në institucionet publike," shtoi ai.
Inspektori i Përgjithshëm Ganaj tha se në shtatë muajt e fundit ILDKPKI-ja ka bërë 55 kallëzime penale dhe ka gjobitur 240 zyrtarë. Kjo shifër, sipas tij, është më e lartë se numri i denoncimeve dhe gjobave të vendosura nga ky institucion në dhjetë vjet.
Raunig dhe Ganaj diskutuan për bashkëpunimin e mëtejshëm mes OSBE-së dhe ILDKPKI-së./ATSH/

TAG:
• OSBE