Reforma e titujve të pronësisë, Gjonaj: Kapitull i ri, ALUIZNI e Hipoteka një e vetme

Në kuadër të aktivitetit të reformës së titujve në Libofshë të Fierit, ministrja e Drejtësisë, Etilda Gjonaj shoqëruar edhe nga dy drejtorët e përgjithshëm, të ZRPP, Valdrin Pjetri dhe ALUIZNI-t, Artan Lame zhvilloi gjithashtu një analizë pune me stafet e dy institucioneve që do të shkrihen brenda Agjencisë Shtetërore të Kadastrës, institucioni përgjegjës për administrimin e regjistrit të pasurive të paluajtshme, si dhe për përfundimin e proceseve kalimtare të pronësisë.

Gjatë fjalës së saj, ministrja Gjonaj u fokusua tek puna zinxhir që do të duhet të kryejnë dy institucione që tashmë do të funksionojnë si një i vetëm. “Nesër do jetë një zyrë, një agjenci e unifikuar, e institucionalizuar e cila nuk do të ketë më thjesht vullnetin apo edhe zbatimin e disa ligjeve të ndryshme për të bashkëpunuar në këto procese por do të konsideroheni të gjithë bashkë si një e vetme. Kemi premtuar që me këtë paketë ligjore qytetarët do marrin shërbim më të mirë brenda një kohe më të shkurtër si dhe do të ulet barra burokratike e dokumenteve që kërkohen nga institucionet shtetërore”,- u shpreh ministrja.

Gjonaj tha se, me miratimin në Kuvend të kuadrit të ri ligjor do t’i jepet zgjidhje njëherë e mirë problematikave të mbartura me regjistrimin e titujve të pronësisë mbi tokën bujqësore. Ministrja Gjonaj e vuri theksin tek rëndësia e procedurave, tek ofrimi i shërbimeve drejtuar qytetarëve, tek rastet korruptive dhe në abuzim me ligjin. Konkretisht, ministrja Gjonaj sqaroi se pritet miratimi në Kuvend i dy pr/ligjeve që do shënojnë një kapitull të ri me pronat (lexo këtu).

TAG:
• pronat
• etilda gjonaj
• hipoteka