Reforma zgjedhore, ekspertët
e ODIHR takojnë sot Topallin

TIRANE- Ekspertët e ardhur nga zyra për Institucione Demokratike dhe të Drejtat e Njeriut (ODIHR) do të nisin sot punën për dhënien e asistencës teknike Komisionit të Posaçëm Parlamentar për Reformën Zgjedhore, gjatë vitit 2012.

Gjatë ditës së sotme është parashikuar që grupi I ekspertëve të zhvillojë takim me kryetaren e kuvendit Jozefina Topalli, si dhe më pas me anëtarët e Komisionit për Reformën Zgjedhore.

Siç njoftoi dje zyra e OSBE në Tiranë, me ftesë të Kuvendit të Shqipërisë, ODIHR-i do të ofrojë këshillim për ndryshimet e planifikuara në Kodin Zgjedhor, që do të hartohen nga Komisioni i Posaçëm, përpara zgjedhjeve parlamentare që pritet të zhvillohen në pranverën e vitit 2013.

“Kjo është pjesë e përpjekjeve më të gjera të ODIHR-it për të ndihmuar Shtetet pjesëmarrëse të OSBE-së, bazuar në kërkesën e tyre, për të siguruar që zgjedhjet të mbahen në përputhje me angazhimet e tyre ndaj OSBE-së dhe me standardet ndërkombëtare për zgjedhje demokratike”, deklaroi Beata Martin-Rozumiloëicz, drejtuese e Departamentit të Zgjedhjeve në ODIHR.

“Sipas praktikës së mirë, të pranuar gjerësisht, që ndryshimet në legjislacionin zgjedhor të paraqiten të paktën një vit përpara zgjedhjeve, ODIHR-i është i gatshëm ta ofrojë menjëherë ndihmën e tij”.

Në kuadër të vizitës 3 ditore, 24- 27 janar, grupi i ekspertëve teknikë të zgjedhjeve do të zhvillojnë takime dhe me përfaqësuesit e partive të vogla politike, përfaqësues të shoqërisë civile dhe komunitetit ndërkombëtar.

Mbështetja e ODIHR-it pason raportin e përfundimtar të kësaj Zyre për zgjedhjet vendore të 8 Majit 2011 dhe të opinionit të përbashkët për Kodin Zgjedhor, të publikuar nga ODIHR-i dhe Komisioni i Venecias i Këshillit të Evropës, në dhjetor 2011. Ndihma ofrohet përmes një projekti të Prezencës së OSBE-së në Shqipëri, me mbështetje financiare të Mbretërisë së Bashkuar.
(sg/shqiptarja.com)

TAG:
• OSBE