Reforma zgjedhore, miratohet
paketa për financimin e partive

TIRANE- Komisioni parlamentar për Reformën Zgjedhore miratoi sot me unanimitet paketën e amendamenteve për kapacitetet e financimit të fushatës elektorale, të subjekteve politik.

"Këto amendamente kishin të bënin me kapacitetet e financimit të fushatës elektorale, të subjekteve politike. Amendamentet konsistojnë në reformimin e parimeve dhe kritereve të financimit të fushatës elektorale si dhe të burimeve publike dhe private të saj.Komisioni miratoi amendamentet e propozuara me unanimitet. "- thuhet në njoftimin për shtyp të Kuvendit.

Ndryshimet përcaktojnë se financimi do të bazohet jo më sipas mandateve në Kuvend, por sipas numrit të përgjithshëm të votave që subjektet politike do të marrin në rang kombëtar në zgjedhjet e radhës.

Zyra e shtypit e Kuvendit njofton se Komisioni i Reformës Zgjedhore shqyrtoi sot amendamentet e propozuara nga ekspertët në zbatim të rekomandimeve të OSBE/ODIHR dhe mbledhja u ndoq nga vetë z. Jessie Pilgrim dhe z. Richard Lappin.

Grupi i ekspertëve ndodhen në Tiranë që prej datës 24 janar për të afruar asistencë teknike në kuadër të ndryshimeve të Kodit Zgjedhor. Axhendën e tyre të takimeve e nisën me kryeparlamentaren Topalli, e cila garantoi se 53 rekomandimet e raporteve paszgjedhore të kësaj strukture do të jenë baza e kodit. Topalli ka vlerësuar dhe zgjedhjet e 8 majit.  Ndërkohë që dje ekspertët e ODIHR zhvilluan një tryezë me krerët e partive të vogla joparlamentare, të cilët i kërkuan këtij institucioni të ngrejë zërin në komsionin e reformës zgjedhore dhe të mos lejojë përjashtimin e tyre si në zgjedhjet e 2009. Kjo është dita e fundit e qëndrimit në Tiranë të ekspertëve të OSBE/ODIHR
(sg/shqiptarja.com)

TAG:
• OSBE