Shkoder-  Forcat elitë RENEA bastisën lagjen e Dobraçit, konsideruar si bazën e fisit Bajri, ku banon edhe i forti i Shkodrës Safet Bajri. Burime jo zyrtare bëjnë me dije se 5 urdhërarreste janë firmosur me urdhër të prokurores e Elida Kaçkini e cila po heton masakrën e 30 tetorit 2024 me 4 viktima në Shkodër. Burimet thonë se nuk është ekzekutuar ende asnjë urdhër-arresti, por janë shoqëruar disa persona të cilët po merren në pyetje.

Janë ushtruar kontrolle në lagjet e Shkodrës si Dobraç, Kiras, Rus, Dergut dhe në fshatrat Shtoj i ri dhe Shtoj i vjeter. Kontrollet janë ushtruar gjatë orëve të mbrëmjes së të mërkurës dhe në orët e para të së enjtes (12 dhjetor). 

Në orën 02.00 të mëngjesit, policia hyri në banesën e Safet Bajrit, ku siç burime për Report Tv thonë, gjetën një arkë kursimi me 19 mijë euro brenda, të cilën Bajri pretendoi se i ka kursime për vajzën e tij 1-vjeçare. Efektivët sekuestruan edhe 2 celularë, të tijin dhe bashkëshortes. Safet Bajri është  marrë në pyetje dhe është lënë i lirë dhe deri më tani ndaj tij nuk ka urdhër arresti.

Policia kontrolloi 10 banesa dhe sekuestroi të paktën 5 automjete të blindura në lagjen Dobrac, dhe disa prej tyre, burimet thonë se u gjetën në vilën e vëllait të Behar Bajrit, kushëri i parë me Safet Bajrin. Për çudi, vilat e 2 kushërinjve janë ngjitur me njëra-tjetrën, por burime pranë tyre thonë se Safeti dhe Behar Bajri nuk flasin mes tyre. Report tv sjell pamjet e operacionit, momentet kur dy makina luksoze ‘Mercedes Benz’ të blinduara mbërrijnë në Drejtorinë e policisë së Shkodrës. Pas tyre dhe një Mitsubishi me targa të huaja.

Burimet thonë se në lagjet e konsideruara si ‘bunker’, Dobraçi dhe Kirasi, ku jeton Astmer Bilali, janë sekuestruar disa armë zjarri. Këto kontrolle – thonë burime të pakonfirmuara, nuk përjashtohet të kenë lidhje edhe me një hetim të ri ndaj Bajrave, në hasmëri disavjeçareve me fisin Lici.

Kontrollet masive me urdhër të SPAK, vijnë 1 muaj e gjysmë pas masakrës me 4 të vrarë pikërisht në këtë lagje, që ka 2 viktima, anëtarë të grupit rival të Bajrave, miqtë Hamza Lici dhe Arlind Bushati, bashkë me çiftin e pafajshëm të bashkëshortëve që udhëtonin me motor.

Masakra e Dobracit u hetua nga Prokuroria e Shkodrës, e cila pas disa javësh shpalli moskompetencë duke ia kaluar aktet e hetimit SPAK-ut.

Masakra e 30 tetorit 2024 në Shkodër, ku nga atentati humbën jetën Hamza Lici e Arlind Bushati, dhe çifti i pafajshëm i bashkëshortëve Bashkim e Flutura Basha, mbetet ende pa autor zyrtar përgjegjës për porositjen apo kryerjen e saj. 

Shenim: Informacioni u përcoll nga gazetarët Sokol Dema, Keti Banushi dhe Ergys Kavaja

Rendit zhvillimet sipas orarit:
Ora 14:12
DETAJI/ Operacioni i RENEA-s në Shkodër, në banesën e Safet Bajrit u gjetën 19 mijë euro, ishin tek arka e kursimit e vajzës 1 vjeçe! Sekuestrohen 5 makina të blinduara

 

Report Tv dhe Shqiptarja.com zbulon detaje nga operacioni i kontrollit ndërmarrë sot me urdhër të SPAK në Shkodër.

Sipas burimeve bëhet e diturse në shtëpine e Safet Bajrit janë sekuestruar 19 mijë euro, në një arke kursimi për vajzën 1 vjeçare të Safet Bajrit. Është thyer arka, dhe i kanë marrë lekët.

Kontrolli në banesë është bërë me vendim gjykate dhe është ndërmarrë në orën 02:00 të mëngjesit.

Safet Bajri është lënë i lirë.

Gjithashtu janë sekuestruar në banesën e Safet Bajrit edhe 2 telefona, celulari i tij dhe celulari i gruas.

Prokurorja Elida Kaçkini që ka leshuar 5 urdhër arreste, po heton masakrën e Dobraçit, dhe urdhër arrestet mund të jenë për masakren e Dobraçit, por nuk përjashtohet mundësia edhe për një hetim të ri.

Asnjë prej urdhërarresteve nuk është ekzekutuar deri më tani. 

Ndërkohë 5 makinat e blinduara të cilat janë të sekuestruara, burimet thonë se janë gjetur në banesen e vëllait të Behar Bajrit. Burimet thonë se vilat e tyre janë pranë njëri tjetrit.  Në lagjen Dobraç, burimet thonë se janë kontrolluar 10 banesa.

Lajmi mberriti në redaksi nga gazetarja Keti Babushi. 


Lajmi ne perditesim...

S.G/Shqiptarja.com