Reshjet e dendura burim aksidentesh! Vetëm pak minuta shi shkaktojnë 6 përplasje në disa qytete

Një aksident rrugor ka ndodhur në aksin rrugor Berat-Dimor në vendin e quajtur ‘Ura e Moravës’. Një automjet tip Toyota me targa AA 215 ZS  përplaset me mjetin tip Ford Fokus me traga AA 048 FA. Dy drejtuesit e mjeteve janë dërguar në spital për trajtim mjekësor. Nga pamjet duket se makina është përmbysur në një anë për shkak të përplasjes.

Policia ka mbërritur në vendngjarje dhe po punon për zbardhjen e shkakut të aksidentit. Dyshohet që edhe ky aksident është shkaktuar nga reshjet e shiut që përfshinë të gjithë vendin në pak minuta.

Një tjetër aksident ka ndodhur në aksin Vlorë-Fier për shkak të motit të keq. Në pamje duket se makina ka dalë nga rruga dhe ka përfunduar në kanal. Për pasojë janë lënduar 2 persona që janë dërguar me urgjencë në spital.

TIRANË- Një aksident i rëndë është raportuar pak minuta pranë Fakultetit Ekonomik në Tiranë ku një makinë është përplasur me shtyllën e tensionit. Siç duket edhe nga pamjet e siguruara nga Report Tv, mjeti tip ‘Audi Q7’ është bërë copash pasi shtylla e tensionit ka përfunduar mbi të.

Ende nuk dihet nëse nga aksidenti ka persona të lënduar. Policia ndodhet në vendgjarje dhe po heton për rastin. 

HIMARË- Një aksident është regjistruar rreth orës 16:30, në vendin e quajtur ‘Qafa e Vishës’ ku një 64-vjeçar duke ka humbur kontrollin e automjetit. Për pasojë, mjeti është përplasur me bordurën anësore të rrugës.

64-vjeçari, së bashku me 2 prej ushtarakëve që udhëtonin në këtë mjet, 23 vjeç dhe 32 vjeç, ndodhen në spitalin e Himarës, jashtë rrezikut për jetën.

Grupi hetimor ndodhet në vendngjarje dhe po punon për sqarimin e rrethanave të aksidentit.

VLORË- Një aksident është regjistruar pak minuta më parë pasditen e kësaj të mërkure në autostradën Fier-Vlorë. Moti me reshje të dendura shiu ka shkaktuar përplasjen e dy mjeteve duke sjellë dëme të shumta materiale. Ende nuk dihet sesi është gjendja e të aksidentuarve.

Grupi hetimor ndodhet në vendngjarje dhe po punon për të zbuluar rrethanat e ngjarjes.

Një aksident automobilistik ka ndodhur në aksin rrugor Ura e Kardhiqit-Sarandë rruga e re. Dy automjete janë përplasur me njëra-tjetrën duke shkaktuar lëndimin e dy personave njëri prej të cilëve njëri është në gjendje më të rëndë shëndetësore.

Ngjarja ka ndodhur në afërsi të tunelit të Skërficës kur të dy mjetet janë përplasur teksa vinin në drejtime të kundërta. Menjëherë të lënduarit janë shoqëruar në Spitalin e Gjirokastrës dhe ndodhen jashtë rrezikut për jetën.

Në vendngjarje ka shkuar Policia Rrugore e cila ka konstatuar se aksidenti ka ndodhur për shkak te lagështisë në rrugë si pasojë e reshjeve të shiut.