Moti i keq/ Bie masivi i dheut, bllokohet Rruga e Arbrit! Dëbora bën të pakalueshëm aksin Bogë-Theth, 6 fshatra në Skrapar të izoluar dhe pa energji (VIDEO)

Ulja e temperaturave dhe reshjet e borës kanë bllokuar dhe lënë në errësirë disa fshatra në ish-komunën Gjerbes të rrethit të Skraparit. 

Moti kështu ka sjellë problematika në fshatrat Gërdec, Leshnje, Gjerbes, Polovinë, Potom dhe Zhepë, të cilat prej 24 orësh janë pa drita si dhe me rrugë të bllokuara duke qenë se stuhia e borës ka dëmtuar rrjetin.

Gjithashtu temperaturat e ulëta kanë rikthyer problemet me zonat e thella të rrethit të Skraparit në fshatrat rrëzë malit Tomor. Më tej edhe aksi rrugor Qafë-Dëvri-Gjerbes, një nga rrugët kryesore që lidh fshatrat e Tomorit me qendrën e Bashkisë Skrapar është bllokuar.
 

Tre ditë pas shembjes, Ura e Shtrezës, pjesë e rrugës Kukës-Shishtavec ka bllokuar mbi 1500 banorë. ARRSH pritet të hap një by pass të rrugës së vjetër për lëvizjen e përkohshme të mjeteve, deri në ndërtimin e urës së re. Në këtë rrugë paraqiten probleme të vazhdueshme edhe me shkëputjen e shkëmbinjve.

Që prej të enjtes fshatrat Novosej, Shishtavec dhe Turaj janë të izoluar. Shkak është bërë rrëzimi i Urës së Shtrezës, pjesë e aksit rrugor Kukës-Shishtavec, si pasojë e  amortizimit dhe reshjeve të shumta të shiut. Tre ditë pas rrëzimit, kjo është pamja që ofrohet.

Ura është vlerësuar e rrezikshme për kalimin e mjeteve dhe nuk lejohet lëvizja, edhe pse në ditën e parë guximtarët provuan fatin.

Deri në ndërtimin e një ure të re efikase që do t’u shërbej mbi 1500 banorë të zonës, nga Autoriteti Rrugor Shqiptar po mendohet hapja e by pass-it të rrugës së vjetër, i cili gjithsesi pritet të marrë kohë.

Ata që preken nga ky bllokim rruge kanë vetëm një mundësi lidhjeje me qytetin e Kukësit, përmes kalimit në dy pika të ndryshme kufitare, Shishtavec-Krushevë-Dragash-Morinë-Kukës, më shumë se dyfishi i kohës dhe gjatësisë së rrugës normale.

Ura e shembur është pjesë e aksit Kukës-Shishtavec, një investim i përfunduar në vitin 2013. Në atë kohë, asnjë prej urave të këtij aksi nuk u prek, përveç asfaltimit të tyre, ndërsa janë të ndërtuara në vitet e fundit të komunizmit.

I gjithë segmenti që përshkon rrugën në fjalë, duke filluar nga Kanioni i Vanave, pëson shkarje masive të shkëmbinjve në stinën e ftohtë, duke rrezikuar jetën e dhjetëra banorëve që e përshkruajnë. Këtë të diel, nga Ura e Nimçës deri tek Ura e shembur e Shtrezës ka pasur reshje dëbore, ndërsa firma e kontraktuar nga ARRSH ka nisur pastrimin nga bora dhe gurët.

Si pasojë e motit me reshje shiu e dëbore në aksin rrugor  Xibër-Qafë Murrizë, është shembur një masiv dheu dhe gurësh duke e bërë këtë aks të pakalueshëm.

Shërbimet e mirëmbajtjes së rrugës me mjetet eskavator po punojnë për hapjen dhe pastrimin e saj.

Shërbimet e Policisë ndodhen në të dy kahet e rrugës për të  orientuar drejtuesit e mjeteve që në raste emergjente të ndjekin aksin e vjetër.