Reuters: SHBA dhe aleatët kërkojnë të përjashtojnë Rusinë nga G20

SHBA dhe vendet e tjera perëndimore po shqyrtojnë një lëvizje për të përjashtuar potencialisht Rusinë nga G20, ka raportuar Reuters, duke cituar burime. Agjencia e lajmeve tha gjithashtu se Polonia të martën u kishte sugjeruar zyrtarëve amerikanë që të zëvendësonte Rusinë në grup dhe se ata morën një "përgjigje pozitive".

G20 është një grupim i ekonomive më të mëdha në botë, i cili synon të koordinojë veprimet për çështjet që prekin ekonominë globale, duke përfshirë ndryshimet klimatike dhe zhvillimin. Një shtytje e tillë do t'i shtonte sanksionet ekzistuese ekonomike kundër Rusisë nga Perëndimi. Por ka të ngjarë të vihet veto edhe nga vende të tjera kyçe të G20-s, përfshirë Kinën, Indinë dhe Arabinë Saudite, sugjerojnë analistët.

Si rezultat, disa parashikojnë se aleatët perëndimorë të G7 mund të bojkotojnë takimet e G20 këtë vit, diçka për të cilën Indonezia, kryesuesja aktuale e klubit, thuhet se është paralajmëruar. Xhakarta ka refuzuar të komentojë mbi këtë çështje.

Rusia gjithashtu ka qenë pjesë e G7, e cila u zgjerua në G8 në vitet 2000, për të akomoduar Moskën në kohë më miqësore. Por ajo u përjashtua pasi aneksoi Krimenë në 2014.
 

Lajmi kryesor:

Vritet një gazetare ruse në Kiev! Zelensky-Biden: Jo sanksione për Abramovich, ai mund të ndërmjetësojë! Putin-Europës: Nëse doni gaz, paguani vetëm me rubla

G.B./Shqiptarja.com

TAG:
• ukraine
• Rusi
• rusia sulmon ukrainen