Rikthimi i basteve online, Braçe: T’i marrë në menaxhim shteti dhe jo bandat! Opozita: Po pranoni dështimin

Pesë  vite pas operacionit ‘fundi i marrëzisë’ kur qeveria i dha fundit rreth 4 mijë pikave të vendosjes së basteve, një ligj i ri që i kthen bastet por këtë herë vetëm online është prezantuar këtë të mërkurë në komisionin e ekonomisë.

Ligji propozim i Qeverisë parashikon legalizimin, i cili sipas mazhorancës bëhet i domosdoshëm kur në treg ka një informalitet shumë të madh të këtij aktiviteti.

“Nisma e qeverisë atëherë për t’i dhënë fund një zallamahije, që kur qeverisnit ju, pra 4200 pika. Dukshëm është pranuar tani që ka një aktivitet ilegal. U arrit që të largoheshin përfundimisht nga çdo vend por po e pranon qeveria që ka një aktivitet ilegal që ta bëjmë legal” tha Eduard Shalsi.

LEXO EDHE:
Ligji në Kushtetuese, profesionistët e lirë kundër tatimit: Ka fuqi prapavepruese, do shtojë evazionin dhe bizneset po mbyllen! Opozita: Goditet shtresa e mesme

Pranimin e dështimit të një beteje që qeveria i vuri ballin dhe sot kthehet pas e konsideroi opozita në komision ligjin e ri.

“Dështim të operacionit të trumbetuar forcë nga qeveria juaj. Sot kjo është marrëzia e fundit që po paraqet qeveria?” thotë Bujar Leskaj.

“Një ligj për të cilin unë edhe sot e kësaj dite jam në gjyq me Kryeministrin e vendit. Thatë që këto nuk do të ktheheshin më në asnjë formë. Po mbylleshin përfundimisht dhe mbylljet epoka e marrënies së shqiptarëve me lojërat e fatit. Pranohet dështimi dhe pranohet që në 6 vite kanë operuar bastet sportive", tha Jorida Tabaku. 

“Ishte vetë Rama që tha se sa të jem unë nuk do të ketë lojëra fati dhe sa të jem unë s’do të ketë lojëra fati”, tha Edmond Spaho. 

Shqetësimi i deputetëve opozitarë në lidhje me ligjin përqendrohej më së shumti në publicitetin që parashikohet për bastet në mediat elektronike.

“Është e pakonceptueshme që këto lojëra të reklamohen në media elektronike. Kushto që ka një internet ndodhet përballë një rreziku potencial të basteve online. Erdhët i thatë këtij parlamenti që po i hiqni nga shkollat dhe rrugët dhe po i vendosni përpara syve të shqiptarëve. Të paktën hiqni dorë nga reklamimi në mediat elektronike duke e vendosur në sy të fëmijë dhe të gjithëve", tha Jorida Tabaku. 

Një qëndrim pro rikthimit të basteve por kundër mënyrës se si qeveria e ka sjellë e mbajti Erion Braçe. Deputeti socialist tha se ky aktivitet duhet të merret nga shteti.

“Ka pasur shumë kompani të kontrolluara nga banditë dhe ato që kanë qenë në territori kanë qenë nipte sekondare të këtyre kompanive. Nuk jam për këtë model por në një model krejt tjetër. Që ta marrë shteti, Ta ketë shteti dhe t’i rrijë përballë.  Do kthehet në luftë siç ishte në luftë midis banditëve”, tha Erion Braçe, deputeti i PS.

Projektligji për rikthimin e basteve online pritet të miratohet nga qeveria në këtë sesion parlamentar.  Ndryshe nga sa ndodhte deri në 2018 kur bastet ishin të legalizuara në Shqipëri, e mund të luaje dhe vije baste fizikisht në mbi 4 mijë pika, ligji i ri përcakton të drejtën e të ushtruarit të këtij aktiviteti vetëm në internet dhe nga jo më shumë se 10 operatorë, të cilët do duhet të plotësojnë disa kushte.

Ligji i ri kërkon që të gjithë ata që do të duan të luajnë duhet të regjistrohen me identitetin e tyre në sistemet online që do të jenë të disponueshme nga kompanitë e licencuara në këtë lloj aktiviteti, të dhëna të cilat do të ruhen për të paktën 3 vjet. Nuk lejohet asnjë pagesë nën dorë.

Të ardhurat e mbledhura nga aktiviteti i basteve sportive online do të orientohen drejt mbështetjes së sportit, kulturës dhe teknologjisë së inovacionit por dhe financimin e programeve të mbrojtjes së lojtarit. Operatorëve që do përfitojnë licencën për baste sportive, do t’u mbahet çdo vit 15% e të ardhurave të cilat parashikohet të shkojnë për financimin e projekteve ne fusha të ndryshme. Të ardhurat do administrohen nga një bord i posaçëm.  

Rendit zhvillimet sipas orarit:

Të Fundit Të Parat

S.G/r.k./Shqiptarja.com

TAG:
• Erion Braçe
• komisioni i ekonomise
• baste online
• Jorida Tabaku