Rimëkëmbja energjetike, reagon
PD: Rama ka sjellë vetëm rrënim

Partia Demokratike ka reaguar pas daljes së kryeministrit Edi Rama në një konferencë pune duke  vlerësuar rimëkëmbjen e sektorit energjetik. Koordinatorja për marrëdhëniet me publikun, Grida Duma, tha se rimëkëmbja në këtë sektor po ndodh vetëm për zyrtarët e lartë. Duma theksoi se korporata ka blerë një litër naftë me 4800 lekë dhe dy gjeneratorë që kushtojnë 79 milionë lekë, i ka blerë me 220 milionë lekë.



Deklarata e plotë e Grida Dumës
Asnjë sallë e regji qendrore nuk i mbulon dot problemet me energjinë në vend, dhe abuzimin në kurriz të qytetarëve.Dhjetra mijë qytetarë që janë mbifaturuar, janë goditur në qindarkat e tyre të fundit nga faturat skandaloze të OSHEE, nuk morën sot asnjë përgjigje.Rimëkëmbja ka ndodhur vetëm për drejtuesit e qeveritarët të cilët janë zhytur në tendera korruptiv, pasi qytetarët e vendit në të kundërt po vuajnë cmimin e rritur të energjisë, mungesën e trajtimit të ankesave të tyre, errësirën në të ftohtë dhe shpesh qelinë e burgut.Edi Rama vazhdon të flasë për plane e investime, por nuk thotë asnjë fjalë për 600 milionë euro, që iu falën kompanisë CEZ, detyrime të njohura, të cilat do të mjaftonin 2 herë për të rinovuar sistemin e shërbimin ndaj qytetarëve.Rimëkëmbje është, kur me njërën dorë ua shet energjinë elektrike kompanive private me 30 euro megavatin, dhe e blen me dorën tjetër me taksat e publikut, po tek këto kompani me 57 euro megavatin, vetëm që drejtuesit dhe qeveritarët të bëjnë biznes 4 milionë eurosh për dy javë?Rimëkëmbje energjitike është kjo, kur KESH e blen naftën me 480 lekë litrin? Ja ku është dokumenti.Rimëkëmbje energjitike është kur KESH jep 220 milionë lekë për dy gjeneratorë, ndërkohë që në dokumentat doganorë rezulton se ato kushtojnë 79 milionë lekë? Ky është rrënim energjetik për vendin e taksat e shqiptarëve. Eshtë vetëm rimëkëmbje financiare për drejtuesit e sistemit dhe qeveritarët që po majmen cdo ditë me të tilla abuzime alarmante.




Redaksia Online 
(g.f/Shqiptarja.com)