Rishikohet çmimi për 11 mijë
dosjet e pronarëve me vendim

TIRANE- Sipas ish-pronarëve ligji i ri do të sjellë për pasojë rrëzimin e më shumë se 11 mijë vendimeve për kthim-kompensim pronash të dhëna në vite, të cilët do të rishikohen dhe do trajtohen sipas formulës së re të qeverisë. Kjo, pasi ligji i ri për trajtimin e pronës i shtrin efektet në të gjitha vendimet për kthim-kompensim të dhëna në vite jo vetëm nga AKKP, por edhe nga Gjykatat Shqiptare, duke mos lënë jashtë as edhe dosjet që janë aktualisht në shqyrtim nga Gjykata e Strasburgut.

“Ky ligj shtrin efektet edhe mbi ekzekutimin e të gjitha vendimeve për njohjen e së drejtës së kompensimit, të dhëna nga organet administrative ose gjyqësore, duke përfshirë çështjet që janë në shqyrtim në gjykatat e të gjitha niveleve, në Gjykatën e Lartë, si edhe në Gjykatën Evropiane të të Drejtave të Njeriut, sa i takon vlerësimit financiar të tyre”, përcakton Neni 3 i Projektligjit “Për Trajtimin e Pronës”, i sapo dërguar për votim në Kuvend nga Këshilli i Ministrave.