Roma fitore me aromë Championsi ndaj Juves, Fiton Barça e mundet Real Madrid

Roma nuk dorëzohet në garën për një vend në Champions sezonin e ardhshëm. Në “Olimpico” skuadra e Ranierit mposhti 2-0 Juventusin që vijon të jetë me pushime dhe kap Milanin në kuotën e 62 pikëve vetëm një më pak se Interi që sonte është i impenjuar me Chievon.

Kampionët e Juves në pjesën e dytë e ulën ritmin dhe verdhekuqtë shënuan golat me Florenzin dhe Edin Dzeko në minutat 80-të dhe 92.

Në javën e 36-të të Serisë A Napoli mposhti 2-1 në transfertë Spal me golat e Allan dhe Mario Rui në pjesën e dytë. Djemtë e Ancelottit prej javësh e kanë blinduar vendin e dytë dhe nuk kanë asnjë objektiv edhe në dy javët e mbetura.

Janë luajtur edhe ndeshjet e parafundit për këtë sezon në La Liga. Barcelona provoi të harronte eliminimin dramatik nga Championsi me një fitore 2-0 ndaj Getafes në “Camp Nou”. Vidal dhe një autogol dënuan miqtë që humbën një mundësi të artë për Championsin por që mbeten ende në garë.

Edhe pse me objektivin e vetëm për të sjellë në formë lojtarët për sezonin e ardhshëm Real Madrid humb sërish. Në “Anoeta” Sociedad mposhti 3-1 Los Blancos që pësojnë humbjen e 11-të sezonale gjë që nuk ndodhte që prej vitit 1999-të. Golin e vetëm për Realin e shënoi Brahim Diaz.

Në barazim u mbyll Atletico Madrid-Sevilla ku golat u shënuan nga Koke dhe Sarabia. Atletico këtë sezon e mbyll si forcë e dytë ndërsa andaluzianët janë 2 pikë larg zonës Champions. Valencia pritet të sigurojë vendin e fundit që të dërgon në Champions pasi mposhti 3-1 Alaves./ Përgatiti Andi Kapxhiu

TAG:
• champions league
• juventus
• roma