Kryetari i Grupit Parlamentar të Partisë Socialiste, Taulant Balla inspektoi nga afër situatën e krijuar nga rrëshqitjet e masiveve të tokës në dy lagje të fshatit Cërrunjë në njësinë administrative, Funar të Elbasanit. Situata është bërë emergjente nga rrëshqitjet masive të tokës, pasi rrezikohen seriozisht banesat dhe jetët e njerëzve. Gjatë inspektimit të situatës, Balla i bëri thirrje banorëve për evakuim të menjëhershëm, ndërkohë që Shërbimi Gjeologjik do të bëjë edhe konstatimet e tij të mëtejshme për të dhënë një gjykim më të specializuar.

“Kemi verifikuar gjithë dokumentacionin dhe rezulton se në vitin 2002-2003, kur ka ndodhur rrëshqitja, është bërë një kompensim nga ana e qeverisë, sipas çmimeve të kompensimit të asaj kohe. Ndërkohë që rrëshqitja e re ka shkaktuar dëmtime edhe në banesa të tjera që nuk kanë qenë pjesë e verifikimit dhe akt-konstatimeve në dokumentacionet e asaj kohe.

Menjëherë do të fillojë procesi i verifikimit të ri për ata që nuk kanë qenë pjesë e procesit të parë, me qëllim që t’u gjendemi pranë të gjitha familjeve. Kjo zonë duhet evakuuar menjëherë, sepse ashtu siç e konstatojmë të gjithë nga momenti në moment pritet që rrëshqitja të vazhdojë dhe për ne më e rëndësishme se gjithçka tjetër.

Masat do të merren nga emergjencat civile me qëllim që të kemi mundësi që banorët e kësaj lagjeje të spostohen diku tjetër, qoftë përmes çadrave apo banesave me qira, me qëllim që të kemi mundësi të garantojmë jetën në rradhë të parë dhe së dyti plotësimin e të gjithë dokumentacionit për të gjithë ata që nuk kanë qenë dëmshpërblyer ndonjëherë”, deklaroi Balla.

d.b/shqiptarja.com