Pas 21 vitesh, është arrestuar në Gjermani dhe ekstraduar drejt vendit tonë 56 vjeçari Byniamin Hajro, i dënuar me 25 vite burg për vrasjen e ndodhur në qershor të vitit 1998, në qytetin e Beratit. Ai akuzohet për vrasje dhe rrëmbimin e Arjan Avdullait dhe Eduart Pemës.

Dy të rinjtë u rrëmbyen, u torturuan e më pas u dogjën, njëri prej tyre i gjallë në lagjen Vakëf në Berat nga një bandë me të njëjtin emër, pjesë e së cilës ishte edhe Hajro.Hetimet për këtë ngjarje nisën më 22 Mars të vitit 1998, me Prokurorinë që ngriti akuza ndaj shtetasve Kudret Zhuka, i arrestuar në dhjetor 2013, Kastriot Frashëri, Byniamin Hajro dhe Gazmend Hoxha.

Me nisjen e hetimeve, familjet e disa prej autorëve të masakrës së ndodhur në Berat u larguan jashtë Shqipërisë nga frika e gjakmarrjes. Por prova vendimtare që siguroi prokuroria, e cila zbardhi edhe ngjarjen, ishte dëshmia e shtetasit Ronaldo Pema, vëllait të njërit prej viktimave.

Ai kishte qenë bashkë me të vrarin në momentin kur makina e autorëve ndaloi aty dhe të akuzuarit me armë në kokë e detyruan të riun të hipte në mjetin e tyre për ta çuar te vendi i keqtrajtimit. Në dëshminë e tij, Ronaldo Pema tregoi me detaje se si 4 të akuzuarit keqtrajtuan dy të rinjtë, dhe më pas i lidhën, u hodhën benzinë, i dogjën, dhe më pas autorët e kësaj ngjarje makabër u larguan të qetë.

Autoritetet shqiptare e kishin shpallur në kërkim prej 21 vitesh Byniamin Hajron, të dënuar në mungesë me 25 vite burg, dënim të cilin 56-vjeçari do të duhet ta vuajë. Hajro ishte në listën e 16 personave më të kërkuar në qytetin e Beratit.