Ruli: Rama po e përdor aksionin në
Lazarat për kapital politik ndaj PD

TIRANE - Deputeti i Partisë Demokratike Genc Ruli, duke folur për aksionin antikanabis të ndërmarrë nga policia në Lazarat, tha se PD e mbështet luftën ndaj drogës, por sipas tij Kryeministri Edi Rama po e përdor këtë aksion për kapital politik.
 
Megjithatë sipas Rulit, emërimet në administratë të personave me precedent penalë nuk tregon bindjen se qeveria po lufton ndaj trafikut të drogës.
 
“Natyrisht tej faktit që jam deputet i kësaj zone, ne e kemi shprehur mendimin tonë që Shqipëria duhet të çlirohet nga droga. PD ka bërë edhe qëndrim zyrtar që ne mbështesim çdo aksion për të zhdukur trafikun e drogës. Ne i kemi bërë thirrje policisë që të kenë kujdes në këtë aksion, nuk duhet të kemi asnjë ekuivok që futja e policisë në Lazarat e shpall të fituar betejën ndaj drgogës. Lazarati është ndoshta si simbol pasi lufta duhet të jetë në çdo cep të vendit. Ndër vite ky rrjet trafiku ka treguar se është mjaft i organizuar. Fakti i emërimerve, i personave me precedent penalë në zyrtat e shtetit, nuk mund të na japë bindjen e plotë se kjo qeveri po lufton drogën. Dhe daljet e shpeshta të ramës në rrjetet sociale që ka synimin për të sulmuar opozitën, tregon të paktën se ai e sheh këtë aksion si kapital politike ndaj opozitës.” theksoi Ruli
 
Lidhur me akuzat e ish-kryeministrit Berisha sipas të cilit policia ka plaçkitur banesat e banorëve të Lazaratit, Ruli tha se sipas PD ka pasur veprime të tilla por se nuk mund të flitet për të gjithë efektivët blu.
 
“Ne dimë që ka pasur edhe veprime, nuk und ta identifikojmë të gjithë policinë. Ka një distancim të dukshëm brenda Lazaratit të banorëve ndaj grupit kriminal. Ka pasur raste edhe të terrorizimit të banorëve nga ky grup kriminal.” tha Ruli
 
I pyetur nga gazetarët se përse ky aksion nuk u ndërmor gjatë qeverisë së djathtë Genc Ruli tha se opozita nuk ka asnjë xhelozi për këtë aksion por sipas tij kjo nuk duhet përdorur për kapital politik pasi lufta ndaj trafikut të drogës është lufta më serioze e qeverisë.
 
“PD ka mbajtur qëndrime mbi fakte që janë evidentuar. Nuk marrim asnjë pozicion që të pengojmë apo ulim vlerat e këtij aksioni, nuk kemi asnjë xhelozi ndaj asaj që ndoshta ne nuk e bëmë, por lufta ndaj drogës kalon çdo capital politik. Është lufta më serioze e qeverisë shqiptare.” u shpreh deputeti i PD

Redaksia Online
(e.c/shqiptarja.com)
 

TAG:
• lazarat