Sarandë, kapen 400 kg drogë
Trafikantët qëllojnë policinë

SARANDË – Kapen 400 kilogramë marijuanë 100 metra në brendësi të kufirit grek, në zonën e Katajetos. Trafikantët që transportonin lëndën narkotike me makinë nuk i janë bindur postobllokut të policisë për të ndaluar. Eshtë njoftuar policia kufitare e cila arriti të ndalojë automjetin dhe të sekuestrojë drogën. Ndërkohë dy trafikantët janë larguar nga vendi i ngjarjes dhe kanë qëlluar me automatik në drejtim të policisë kufitare, por fatmirësisht nuk ka patur të plagosur. Shefi i komisariatit të Sarandës Altin Merizaj konfirmoi ngjarjen për A1 REPORT. Sipas Merizajt po vazhdon operacioni për kapjen e dy trafikantëve të pajisur me armë tip kallashnikov. Për këtë arsye janë kërkuar përforcime nga policia e Gjirokastrës dhe nga Policia e Shtetit.

Policia Kufitare e Sarandës sekuestroi lëndën narkotike e cila ishte e depozituar në tetë canta të mëdha shpine me ngjyrë të zezë. Trafikantët janë dy të rinj sarandiotë me emrat Redi.T dhe Sulo. M përkatësisht 20 dhe 25 vjec.

Personat që tashmë janë shpallur në kërkim policor ishin të pajisur me armë zjarri dhe në momentin e kapjes nga Policia Kufitare të sasisë së marijuanës, ata kanë qëlluar me armë zjarri në drejtim të kufitarëve shqiptarë në shenjë hakmarrjeje duke u larguar në thellësi të territorit grek.

Policia Kufitare e Sarandës ka vënë në dijeni Policinë Kufitare greke të cilat kanë nisur një aksion të përbashkët për gjetjen dhe arrestimin e trafikantëve. Kontrolli po përqëndrohet në malin e Cifligut dhe në Kepin e Stillos për të kapur autorët e trafikut të mariuanës. Droga është marrë nga Lazarati një ditë më parë kundrejt 250 mijë eurove. (p.n./ r.d/shqiptarja.com)

TAG:
• lazarat