Satelitët që do të mbanin emrat 'Albania 1' dhe 'Albania 2' do të duhej të ishin tashmë në orbitë, pasi kryeministri Edi Rama deklaroi vitin e kaluar se një gjë  e tillë do të ndodhte brenda marsit të viti 2022.

E ndërsa jemi në prill dhe Shqipëria nuk ka asnjë satelit në orbitë, kryeministri ka sqaruar se ai do ta mbajë zotimin e dhënë, por se vonesat nuk janë në dorë të tij.

"Padurim të madh paskan pasur disa për satelitët e sipas modës së re thonë ç'të duan pa pyetur fare more si është puna! Po një gjë çuditem si nuk duan ta kuptojnë:Unë them atë që bën e bëj atë që them dhe kur vonesat s'janë në dorën time thjesht bëj durim,po zotimit s'i ndahem jo!", shkruan ai në Twitter.

Në tetor të viti të kaluar Rama habiti jo pak kur tha se Shqipëria do të dërgojë dy satelitë në orbitë. Ai sqaroi se satelitët dhe dronët inteligjentë do të ndihmojnë për të patur kontroll të plotë mbi të gjithë territorin e vendit dhe se Shqipëria nuk do t'i dërgojë për ofensiva ushtarake apo për kërkime në Mars, por do të shpërbejnë për çështje civile të vendit.