Realizimi i objektivit për të qenë pjesë e ekipit të futbollit legjendar të Milanit si sponsorizues është shoqëruar me telashe për biznesmenin e naftës, Rezart Taçi, pasi italianët e “Infront Italy” Srl, që ishin ndërmjetësit e “Taçi Oil” në diskutimet për sponsorizimin e kuqezinjve kërkojnë kthimin e detyrimit dhe shpenzimeve të tjera. Shoqëria përmbarimore “Strati Bailiff`s Service” sh.p.k, ka kërkuar vendosjen e sekuestros konservative mbi aktivet e regjistruara te shoqëria “Taçi Oil International Trading & Supply Company”.

Kërkesa është bërë në Gjykatë në 22 prill 2015 dhe është regjistruar në Qendrën Kombëtare të Regjistrimit në 7 maj. Në shkresën e drejtuar Qendrës Kombëtare të Regjistrimit urdhri për sekuestro konservative është marrë pasi shoqëria “Taçi Oil International Trading & Supply Company”, sipas një vendimi të Gjykatës së Milanos (datë 21.08.2013), i njohur dhe nga Gjykata Shqiptare duhet t’i paguajë shoqërisë lider në marketingun ndërkombëtar sportiv “Infront Italy” Srl shumën prej 2.3 milionë euro si dhe shpenzime të tjera për procedurë dhe interesa.  “Taçi Oil International Trading & Supply Company” rezulton në QKR me status të pezulluar që nga dhjetori i vitit 2014.

Dëshira e biznesmenit Rezart Taçi para 4 vitesh për të blerë disa aksione te Milani bëri jehonë, jo vetëm në Shqipëri, por edhe në mediat italiane dhe më gjerë, por negociatat dështuan duke lënë në sirtar ëndrrën dhe ambicien e shqiptarit, e cila mbeti vetëm në kuadrin e sponsorizimit. Marrëveshja e sponsorizimit sipas mediave italiane u zyrtarizua në selinë e Milanit në prani të administratorit Adriano Galliani, Presidentit të “Taçi Oil” Rezart Taçi dhe Marco Bogarelli, President i “Infront Italy”. 2013 solli një kthesë të menjëhershme në aktivitetin e “Taçi Oil”, pasi u tërhoq nga blerja e “Albpetrol” pasi nuk arriti të derdhë shumën e ofruar 850 milionë euro.

Faksimilet e vendimit
rezart taci
rezart taci


d.b/shqiptarja.com