Selami: Zgjedhjet të shtyhen në
shtator, Basha të japë dorëheqjen

Kandidati për postin e kryetarit të Partisë Demokratike, Eduard Selami gjatë një prononcimi për mediat deklaroi se i ka kërkuar zyrtarisht Lulzim Bashës që të shtyhen zgjedhjet për kreun e ri të së djathtës për në shtator, por kryetari i ‘ngrirë’ nuk ka pranuar.
 
Selami u shpreh se Basha i kishte thënë se nuk ka kompetencë për të vendosur datën e zgjedhjeve dhe nuk mund ta ndryshonte.
 
“U takova me Bashën dhe biseda ka për qëllim për të bërë një garë sa më të pastër që të dalim sa më të fortë. Ne u takuam me simpatizantët atje dhe i bëra një vërejtje shoqërore ‘që e ka nisur pak me vonesë fushatën’.

Kjo është një garë brenda familjes, një garë vizioni. Ka kohë që unë kam mbajtur një qëndrim ndaj Bashës. Duhet një lidership i ri dhe fatkeqësisht Basha nuk e ka, unë mund ta bëj këtë gjë.
 
I sugjerova që data 22 nuk na jep kohë për fushatë dhe unë propozoj javën e parë të shtatorit, ai më tha që nuk është kompetencë e tij. Një shtyrje do të jepte më shumë mundësi’ tha ai.
 
Gjithashtu, Selami zbuloi se gjatë takimit i ka kërkuar Bashës që të jepte dorëheqjen për një garë të barabartë.
 
“Nëse do të isha në vendin e Bashës do të jepja dorëheqje. Edhe pse nuk e jep dorëheqjen unë do të vazhdoj garën në PD.
 
Ndaj shqetësimin e grupeve të tjera në PD për shkeljen e statutit, por zgjidhja është institucionale.
 
Gara ka vend që të jetë më e pastër, por nuk mendoj që duhet të bllokojmë procesin, pasi PD do të futej në një spirale të pakëndshme” deklaroi ai.
 
Deri tani zyrtarisht gara për PD është mes Selamit dhe Bashës, pasi Patozi duket se ka mbetur jashtë, pasi kryetari i ‘ngrirë’ nuk ka pranuar kërkesën për dorëheqje.