Bota

Senatori amerikan, McCain: Takimi Trump-Putin, një gabim tragjik

Senatori republikan i Shteteve të Bashkuara të Amerikës, John McCain, kritikoi takimin mes dy presidentëve Trump dhe Putin, duke e cilësuar edhe si një “gabim tragjik”.

Senatori republikan, John McCain

Redaksia 17 Korrik 2018, 07:41 | Përditesimi: 17 Korrik 2018, 07:45

Presidenti amerikan, Donald Trump, u takua dje me homologun e tij rus, Vladimir Putin në kryeqytetin e Finlandës, Helsinki, ku folën për çështje të ndryshme. Pika e vetme ku të dy presidentët u shfaqën tërësisht në një mendje, ishte ajo e ndërhyrjes së supozuar ruse, në zgjedhjet e Shteteve të Bashkuara, në fund të 2016-ës, çështje e cila është ende nën hetim.

Në një konferencë për shtyp, e cila u cilësua nga amerikanët si më e dobëta e një presidenti amerikan dhe gati-gati si tradhti kombëtare, Trump kritikoi FBI-në dhe Departamentin e Shtetit në lidhje me këtë çështje dhe theksoi se stafi i tij nuk ka pasur lidhje me Moskën.

Menjëherë pas kësaj konference, reagoi edhe senatori republikan i Shteteve të Bashkuara të Amerikës, John McCain, i cili kritikoi takimin mes dy presidentëve, duke e cilësuar edhe si një “gabim tragjik”.

LEXO EDHE:
Planet e administratës Trump për t’i dhënë fund luftës në Gazë

McCain theksoi gjithashtu se presidenti i Shteteve të Bashkuara kishte dështuar të mbronte vendin e tij dhe madje e kishte çuar reputacionin e SHBA-ve në një pikë të ulët, të paparë ndonjëherë.

“Jo vetëm që Presidenti Trump dështoi të fliste të vërtetën për një kundërshtar, por duke folur për Amerikën në botë, presidenti ynë nuk arriti të mbrojë gjithçka që na bën këta që ne jemi, një republikë e njerëzve të lirë”, tha McCain për deklaratat e Trump.

TAG: