Tre organizata serbe nga Kosova kanë kallëzuar penalisht në Beograd presidentin Aleksandar Vuçiç dhe katër politikanë të tjerë serbë. Ata i akuzojnë se me politikat e tyre ndaj Kosovës kanë ndihmuar në mbylljen e institucioneve serbe që funksiononin në territorin e saj.
Kallëzimi u dorëzua këtë të hënë, më 16 nëntor, në Prokurorinë e Lartë Publike në Beograd, nga Këshilli Kombëtar Serb i Kosovës, Forumi Kombëtar Serb nga Graçanica dhe organizata “Otadžbina”. Përveç Vuçiçit, kallëzimi është bërë edhe ndaj Ivica Daçiçit, Ana Bërnabiçit, Petar Petkoviçit dhe Goran Rakiçit.
Tre organizatat i akuzojnë pesë politikanët se kanë tejkaluar kompetencat e tyre, kanë shpërdoruar detyrën dhe nuk kanë përmbushur përgjegjësitë që kishin. Në qendër të akuzave është mbyllja e institucioneve të Serbisë në Kosovë. Sipas këtyre organizatave, gjatë viteve që Vuçiç dhe Daçiç kanë qenë në pushtet, janë mbyllur shumë institucione që funksiononin sipas sistemit serb.
Madje, në një deklaratë të mëparshme, Këshilli Kombëtar Serb i krahasoi pasojat e politikave të Vuçiçit dhe Daçiçit ndaj Kosovës me ato të bombardimeve të Serbisë në vitin 1999. Organizatat e akuzojnë Vuçiçin edhe për marrëveshjet e arritura me Kosovën, përfshirë Marrëveshjen e Brukselit, kalimin e policëve dhe gjyqtarëve serbë në institucionet e Kosovës, si dhe marrëveshjen e Ohrit për normalizimin e marrëdhënieve mes dy vendeve.
Sipas tyre, këto vendime kanë ndihmuar në forcimin e institucioneve të Kosovës, ndërsa kanë dobësuar praninë e Serbisë atje.
Kallëzimi ishte paralajmëruar që më 27 tetor, pas fitores së Listës Studentore në zgjedhjet parlamentare në Serbi. Fillimisht ishte njoftuar vetëm për Vuçiçin dhe Daçiçin, por më pas në listë u shtuan edhe tre politikanët e tjerë.
Këto organizata kishin kërkuar edhe në vitin 2024 që Vuçiçi të ndiqej penalisht, duke e akuzuar se me vendimet e tij kishte ndihmuar Kosovën të forcohej si shtet i pavarur.










Komente
Komento