Shtetet e Bashkuara të Amerikës kanë bërë akuza të drejtpërdrejta ndaj presidentit rus Vladimir Putin. Duke mbështetur një raport të Thesarit Amerikan, ku theksohet se Putin është i korruptuar, Zëdhënësi i Shtëpisë së Bardhë, Josh Earnest tha se ky është dhe vlerësimi i Obamës.

Zëdhënësi i Shtëpisë së Bardhë, Josh Earnest, ka thënë se raporti i zyrtarit të Thesarit amerikan se presidenti rus, Vladimir Putin, është i korruptuar, reflekton edhe pikëpamjet e administratës së presidnetit Barack Obama.

Adam Szubin, ushtrues i detyrës së sekretarit të Thesarit për terrorizëm dhe krime financiare, ka thënë në një intervistë për BBC-në më 26 janar se Putin është pasqyrë e korrupsionit , i pasuruar në mënyrë sekrete, i korruptuar dhe i fokusuar në pasurimin e miqve të tij dhe aleatëve politikë.

Zëdhënësi i Putinit, Dmitry Peskov, është përgjigjur me zemërim ndaj komenteve të Szubinit, duke i cilësuar ato si gënjeshtër.
Putin vazhdimisht ka thënë se raportet e mediave për pasurinë e tij të madhe, përfshirë edhe raportet se ai është personi më i pasur në botë, janë të pakuptimta.

Shtetet e Bashkuara kanë vendosur sanksione kundër biznesmenëve rusë, besnikë ndaj Putinit, për të bërë presion mbi Kremlinin, për shkak të aneksimit që i ka bërë Krimesë dhe mbështetjes së vazhdueshme për separatistët pro-rusë në lindje të Ukrainës.

Redaksia online
(Shqiptarja.com)